Mitsotakis pritet të jetë Kryeministri i ri i Greqisë
Të gjitha sondazhet tregojnë avantazh të Demokracisë së Re
Të dielën, Greqia mban zgjedhjet e parakohshme parlamentare, të cilat këtë herë pritet t’i japin vendit fqinj një drejtim tjetër politik.
Partia e krahut të majtë të Kryeministrit Alexis Tsipras pritet të pësojë një humbje të thellë në këto zgjedhje dhe jo vetëm kaq. Demokracia e Re e krahut të djathtë besohet se mund të arrijë një fitore masive, sa për të qeverisur e vetme, pa pasur nevojë për koalicione të brishta që cenojnë qëndrueshmërinë qeveritare. Kreu i saj, Kyriakos Mitsotakis, në tubimet e tij është shfaqur duke ngritur grushtin lart në ajër, në shenjë triumfi. Njeriu që me shumë gjasa ka për t’u bërë Kryeministri i ardhshëm i Greqisë, tha para mbështetësve të tij në Athinë, se “Të dielën, Greqia do të bëhet blu, bluja e qiellit, bluja e detit. Të dielën, ne votojmë, të hënën kthejmë një faqe”. Ekspertët shprehen se demokracia mund të prodhojë rezultate të papritura, por çdo analist pajtohet se këto zgjedhje në Greqi e kanë një përfundim të pritshëm qartë. Të gjitha sondazhet tregojnë për fitoren e Demokracisë së Re të qendrës së djathtë të Mitsotakis, madje sugjerohet se partia është në rrugë të mirë për të fituar një shumicë të drejtpërdrejtë, në atë që do të ishte një ndryshim i rëndësishëm për një vend të qeverisur nga koalicione të brishta gjatë dekadës së kaluar. Të enjten, një sondazh i “Pulse” tregoi se konservatorët kryesonin ndaj “Syriza”- s me tetë pikë përqindjeje. Kjo do të thotë se “Demokracia e Re’ do të fitonte nga 155 deri në 159 vende në Parlamentin grek me 300 deputetë, duke përsëritur rezultatet spektakolare që arriti në zgjedhjet europiane, në maj. Ishin pikërisht ato zgjedhje, që detyruan Kryeministrin Alexis Tsipras të thërrasë zgjedhje të parakohshme, tre muaj përpara përfundimit të mandatit të tij. Mitsotakis, djali i një ish- Kryeministri, i cili është detyruar të përballet me akuza për privilegj dhe nepotizëm, ka besimin e votuesve. Ish- bankieri ka bërë një fushatë të fuqishme, duke përshkuar vendin për të dëgjuar problemet e grekëve të zakonshëm. Në një komb të përballur gjatë me krizën financiare të Europës, ai është përqendruar kryesisht në përtëritjen ekonomike, duke premtuar uljen e taksave, tërheqjen e investimeve të huaja dhe krijimin e vendeve të punës. “Fuqia nuk është qëllimi, është vetëm një mjet për ta bërë jetën më të mirë për qytetarët”, ka thënë ai. Mitsotakis është kredituar me rehabilitimin e një prej partive më tradicionale konservatore të Europës, e cila jo shumë kohë më parë ishte e lidhur me politikat e kriminalitetit dhe korruptimit, që shihen si shkaku për problemet financiare të vendit, me rritjen e borxhit.