KQZ pranon gabimin me votuesit: Të dhënat erdhën me telefon
“Në disa qendra votimi s’ka mbulim valësh të telefonisë celulare”
Komisioni Qendror i Zgjedhjeve doli dje me një reagim publik për sa i përket saktësisë së informacionit të publikuar mbi pjesëmarrjen në zgjedhje.
Nëpërmjet një komunikate për mediat, KQZ thekson se për publikimin e të dhënave është ndjekur e njëjta metodologji si në zgjedhjet e shkuara, duke renditur edhe disa problematika. KQZ, në sqarimin e saj, thekson se të dhënat janë transferuar me telefon dhe për rrjedhojë, në disa QV nuk ka pasur mbulim me rrjet telefonie, çka ka sjellë pasaktësi. “Kodi Zgjedhor, në asnjë dispozitë të tij, nuk përcakton detyrimin që KQZ të publikojë informacion për pjesëmarrje në zgjedhje gjatë ditës së votimit. Komisioni Qendror i Zgjedhjeve, pavarësisht se pa detyrim të shprehur në Kodin Zgjedhor, në respekt të opinionit dhe interesit publik, si dhe rritjes së transparencës për procesin zgjedhor, realizon dhënien e informacionit për pjesëmarrje në votim gjatë ditës së zgjedhjeve. Informacioni për pjesëmarrje në votim gjatë ditës së zgjedhjeve jepet nga Sekretari i Qendrës së Votimit. Informacioni që transmeton KZAZ në KQZ për pjesëmarrje ditën e votimit, bazohet në të dhënat e transmetuara përmes telefonit celular nga KQV- të, ku për shkaqe objektive, si mosmbulimi i zonave të caktuara gjeografike me sinjal telefonik, mungesës së komunikimit nga ana e sekretarëve të QV- ve, në asnjë rast nuk mund të pretendohet saktësia e tyre”, thekson institucioni. Një nga argumentet e tjera se përse ka pasur pasaktësi në të dhënat, sipas KQZsë, është edhe fakti se listat e zgjedhësve i administron kryetari i KQV- së, ndërsa të dhënat i transferon sekretari i KQV- së. “Gjithashtu, duhet marrë në konsideratë fakti që lista e zgjedhësve administrohet nga kryetari i KQV- së, ndërsa të dhënat transmetohen nga sekretari i KQV- së, i cili duke mos disponuar dokumentin ku numri i votuesve evidentohet përmes nënshkrimeve, referon të dhëna për pjesëmarrjen në votime bazuar në shënimet e mbajtura, pra, është evidente se shifra e transmetuar nga sekretari i KQV- së nuk mund të ketë saktësi maksimale. Gjithashtu, edhe për informacionin që merret nga KZAZ- të dhe publikohet nga KQZ, pas orës 19: 00, referohen të dhëna, të cilat nuk janë përfundimtare. Qendrat e Votimit mbyllen në orën 19: 00, ose përtej kësaj ore, për shkaqe të parashikuara në Kodin Zgjedhor. Vetëm pas mbylljes së votimit, Komisioni i Qendrës së Votimit kryen procedurat për nxjerrjen e të dhënave, përfshirë edhe numrin e zgjedhësve që kanë votuar, dhe dokumentimin e tyre në procesverbalin që KQV plotëson, duke respektuar procedurat e nenit 113 të Kodit Zgjedhor. Pra, edhe në orën 19: 00, kur sekretari i KQV duhet të kryejë raportimin e fundit përmes telefonit celular, ai nuk disponon të dhënat e sakta për numrin e zgjedhësve që kanë marrë pjesë në votime, pasi kryetari i KQV, nën vëzhgimin e të gjithë anëtarëve të KQV dhe të vëzhguesve, nuk ka kryer ende veprimet për përcaktimin e numrit të zgjedhësve që kanë votuar mbi bazën e nënshkrimeve të tyre në listën e zgjedhësve dhe në Regjistrin e Posaçëm të Zgjedhësve”, shprehet KQZ. Për sa i përket metodologjisë, institucioni thekson se kjo është një praktikë e ndjekur edhe në zgjedhjet e shkuara ku edhe në ato procese ka pasur parregullsi në të dhënat paraprake. Por KQZ pranon se në ato zgjedhje është përdorur edhe email në dërgimin e të dhënave, çka është një mjet që fakton informacionin e dërguar. “Transmetimi i informacionit nga KZAZ në KQZ për pjesëmarrje në votime përmes telefonit celular, është përdorur edhe në zgjedhjet e mëparshme në kushtet e mungesës së modulit për realizimin e transmetimit të tij. Në zgjedhjet vendore 2015, ato për Kuvendin 2017, zgjedhjet e pjesshme 2013, 2016, 2017, transmetimi i informacionit për pjesëmarrje në votime nga KZAZ- të në KQZ është bërë si përmes dërgimit me email të informacionit, po ashtu edhe me anë të telefonit celular, kur KZAZ- të nuk arrinin të dërgonin informacion në rrugë elektronike, për shkak të ngarkesës së punës ose qoftë edhe për neglizhencë.
Lista e zgjedhësve administrohet nga kryetari i KQV- së, ndërsa të dhënat transmetohen nga sekretari i KQVsë, i cili duke mos disponuar dokumentin ku numri i votuesve evidentohet përmes nënshkrimeve, referon të dhëna për pjesëmarrjen në votime bazuar në shënimet e mbajtura, pra, është evidente se shifra e transmetuar nga sekretari i KQV- së nuk mund të ketë saktësi maksimale