Rrjedhjet sekrete, Britania mbron ambasadorin që zhvlerësoi Trump
Një skandal i rrjedhjes së telegrameve diplomatike të ambasadorit britanik në SHBA, gjatë komunikimit me qeverinë britanike, ka shkaktuar zemërim në administratën amerikane, bazuar në vlerësimet tejet të ulëta të ambasadorit Kim Darroch mbi Presidentin amerikan dhe aftësinë e tij. Qeveria britanike ka nisur gjurmimin e “urithit” në administratë apo jashtë saj, që ka nxjerrë të hënën memorandumet sekrete nga ambasadori britanik në Uashington. Qeveria britanike është sikletosur kur u ekspozuan këndvështrimet e Sir Kim Darroch mbi një Shtëpi të bardhë “të patakt dhe të paaftë’. Vlerësimet e ambasadorit kanë marrë një përgjigje të zemëruar nga Presidenti Donald Trump, i cili tha se diplomati veteran “nuk i ka shërbyer mirë vendit të tij”. Por qeveria britanike i ka hedhur poshtë paralajmërimet se pozicioni i Sir Kim tani ishte i papërshtatshëm, duke këmbëngulur se ai po bënte punën e tij për të dhënë informacion të sinqertë pas dyerve të mbyllura. Ambasadori pritej të dilte në pension janarin e ardhshëm. Kryeministrja britanike i ka hedhur poshtë vlerësimet se pas zbulimit të komunikimit sekret mund të qëndrojë Rusia, por disa deputetë vlerësojnë se një mbështetës i lartë i Brexit mund të jetë përgjegjës për këtë. Telegramet diplomatike besohet se janë shpërndarë në rreth 100 njerëz që nga viti 2017, duke përfshirë një numër të vogël ministrash dhe këshilltarëve të tyre të posaçëm. Ish- diplomatët sugjeruan se Akti i Sekreteve Zyrtare mund të ishte thyer. Sekretari i Jashtëm, Jeremy Hunt, dhe Sekretari i Tregtisë, Liam Fox, e mbrojtën Sir Kim, duke thënë se ai ishte thjesht duke bërë punën e tij. “Është e rëndësishme të thuhet se kjo ishte një pikëpamje personale”, tha Hunt. Po ashtu edhe Fox deklaroi se “Nuk është pikëpamja e qeverisë britanike dhe nuk është pikëpamja ime”. Teorikisht, amerikanët mund ta dëbojnë diplomatin, por kjo do të ishte e pashembullt që nga pavarësia, në shekullin e 18- të.