Persida Asllani largohet nga Biblioteka Kombëtare, i rikthehet universitetit
Me vendim të Këshillit të Ministrave, Persida Asllani nuk do të jetë më drejtore e Bibliotekës Kombëtare të Shqipërisë. Në mbledhjen e djeshme të qeverisë, Kryeministri Edi Rama firmosi lirimin nga detyra të Asllanit. Lirim, i cili mësohet të ketë ardhur pas kërkesës së vetë Asllanit për t’u larguar nga kjo detyrë, me qëllim rikthimin në karrierën universitare. Në përfundim të afatit ligjor, që parashikon Ligji i Arsimit të Lartë dhe aktet e tij nënligjore për mundësinë e ruajtjes së vendit të punës në Institucionet e Arsimit të Lartë, për një periudhë maksimale prej 5 vjetësh dhe pa mundësi përsëritjeje, Persida Asllanit i është dashur të vendosë mes postit të drejtorit të BK- së dhe universitetit. Karriera e saj universitare ka zënë fill në vitin 1995 në Universitetin e Tiranës, me emërimin si pedagoge në Departamentin e Letërsisë dhe e vetmja shkëputje prej saj ndodhi para 5 vjetësh kur iu besua drejtimi i Bibliotekës Kombëtare. Një institucion, të cilin ajo e drejtoi përgjatë një periudhe të vështirë, duke pasur parasysh dy ngjarjet e rënda të ndodhura në BK, përmbytja dhe rënia e zjarrit në një prej seksioneve të fondit të bibliotekës. Përgjatë kësaj periudhe, Asllani ka vënë në dukje në mënyrë të vazhdueshme problematikat që paraqet ky institucion, sidomos në aspektin e hapësirave, të ruajtjes dhe mbrojtjes së fondeve të tij. Ajo ka qenë në përpjekje të vazhdueshme për të siguruar të tjera hapësira për kalimin e një pjese të fondit; për të identifikuar hapësira të mundshme se ku mund të ngrihej godina e re e BK dhe ka konsideruar si domosdoshmëri ngritjen e Bibliotekës së kryeqytetit, që do të lehtësonte punën e Bibliotekës Kombëtare. Por, krahas problematikave, Asllani i dha një frymë të re këtij institucioni, duke e hapur edhe më tepër ndaj lexuesit dhe studiuesve, duke shtuar veprat e dixhituara, duke lehtësuar aksesimin e veprave të rralla të bibliotekës, duke përkujtuar përmes konferencash e ekspozitash figura të nderuara të letrave shqipe.
Pas largimit nga detyra të Asllanit, Ministria e Kulturës do të hapë konkursin për emrin e ri që do të drejtojë këtë institucion.