"Vendi më i korruptuar në Ballkan", raporti i SHBA kritika qeverisë për PPP dhe investimet e huaja
OKB, ALARM PER POPULLSINE: DO MBETENI VETEM 1 MILION
Shqipëria perceptohet si vendi më i korruptuar në Ballkanin Perëndimor. Ky është konkluzioni i dalë nga raporti i Departamentit Amerikan të Shtetit, i cili e ka vlerësuar si katastrofike klimën e biznesit në Shqipëri.
Ditën e djeshme, Departamenti Amerikan i Shtetit publikoi raportin vjetor mbi Klimën e Investimeve në Shqipëri, ku thekson se vendi vuan nga një korrupsion i lartë në institucione, favorizimi i sipërmarrjeve të lidhura me politikën dhe ligjet e dështuara të qeverisë për të bërit biznes. "Shqipëria është një vend i korruptuar, ku mungon transparenca, ligjet janë joefikase dhe favorizohen kompanitë sipërmarrëse të lidhura me politikën", kështu e cilëson raporti vjetor i Departamentit Amerikan të Shtetit klimën e biznesit në Shqipëri. Sipas dokumentit amerikan, investitorët e huaj ankohen për korrupsionin e lartë, sidomos në gjyqësor, për mungesën e transparencës në prokurimet publike dhe për kontratat e pafuqishme. Dokumenti vlerëson se pavarësisht Reformës në Drejtësi, investitorët e huaj e perceptojnë klimën e biznesit si problematike dhe thonë se Shqipëria mbetet një vend i vështirë për të bërë biznes.
PROBLEMATIKAT
Krahas kësaj, një tjetër shqetësim në rritje për investitorët e huaj, sipas raportit të Departamentit të Shtetit, është se entet rregullatore e kanë të vështirë të interpretojnë legjislacionin kontradiktor dhe rregulloret dhe përfundojnë duke favorizuar kompanitë e lidhura me politikën. "Rregullat dhe ligjet për qeverisjen e biznesit ndryshojnë shpesh dhe pa konsultime domethënëse me komunitetin e biznesit. Gjithashtu, biznesmenët e huaj ndodhen nën presion për të punësuar nënkontraktorë të lidhur me qeverinë", vijon raporti. Një tjetër pikë, ku Departamenti i Shtetit ndalet në analizën e tij, është partneriteti publik- privat, që, sipas tij, ka reduktuar ndjeshëm shanset për një konkurrencë të drejtë në treg si edhe problematikat me titujt e pronësisë. "E drejta e pronës mbetet një tjetër sfidë për Shqipërinë, pasi titujt e pronësisë janë shumë të vështirë për t'u siguruar dhe legjislacioni për këtë është i papërshtatshëm", nënvizon më tej raporti. Sipas dokumentit, një tjetër problematikë në këtë fushë është edhe fenomeni i korrupsionit në gjykata për të përfituar ilegalisht prona. "Gjithashtu, Agjencia për Kthimin dhe Kompensimin e Pronave nuk është funksionale dhe dështon në implementimin e procedurave", thekson raporti. Sa i takon legjislacionit, Departamenti i Shtetit vlerëson se ligjet e miratuara nga qeveria, si ai për Investimet Strategjike dhe ai për krijimin e Zonave Ekonomike nuk kanë dhënë rezultate. "Shqipëria perceptohet si vendi më i korruptuar në Ballkanin Perëndimor dhe vazhdon të shënojë progres të dobët në fushat e forcimit të kontratave, regjistrimit të pronave, dhënien e lejeve të ndërtimit dhe sigurimin e energjisë elektrike", përfundon raporti.