Gjyqtarët padisin shtetin për pasaportat diplomatike
Gjyqtarët e konsiderojnë vendimin si cenim të statusit
Shoqata e Gjyqtarëve të Shqipërisë ka ngritur padi ndaj shtetit për heqjen e pasaportave diplomatike, duke e konsideruar këtë vendim si një cenim të statusit të gjyqtarit.
Vendimi për heqjen e pasaportave diplomatike u propozua nga Ministria e Jashtme, në kuadër të një reformimi, por këtë të enjte, në Gjykatën Administrative Tiranë, Shoqata e Gjyqtarëve kërkoi prishjen e vendimit. Në kërkesëpadi, gjyqtarët kanë ngritur tri pika që duhet të prishen nga Administrativja. "Konstatimin e cenimit të statusit të gjyqtarit nëpërmjet heqjes së pasaportës së shërbimit me Vendimin e Këshillit të Ministrave nr, 389, datë 12.06.2019, ' Për kriteret për lëshimin e pasaportës diplomatike dhe asaj të shërbimit', si një e drejtë e fituar e që ' nuk mund të ulet', në kundërshtim me nenin 22 të Ligjit nr. 96/ 2016 - Për statusin e gjyqtarëve dhe prokurorëve në Republikën e Shqipërisë. Konstatimin e paligjshmërisë dhe shfuqizimin e Lidhjes 2 të Vendimit të Këshillit të Ministrave nr. 389, datë 12.06.2019, ' Për kriteret për lëshimin e pasaportës diplomatike dhe asaj të shërbimit', në pjesën që nuk parashikon gjyqtarët si subjekte zyrtarë, që kanë të drejtë të pajisen me pasaportë shërbimi. Konstatimin e paligjshmërisë dhe shfuqizimin e pikës 14 të Vendimit të Ministrave nr. 389, datë 12.06.2019, në pjesën që parashikon se pasaportat e shërbimit të gjyqtarëve të lëshuara para datës 14 qershor 2019 humbin vlefshmërinë me datë 31 dhjetor 2019", shkruhet në kërkesëpadinë e bërë nga Shoqata.
REAGIMI Lajmin për padinë e ka bërë të ditur gjyqtari Florian Kalaja, i cili duke cituar një vendim të Gjykatës Kushtetuese, sa u takon të drejtave të gjyqtarëve që mbrohen me ligj, bën me dije se padia është dorëzuar gjatë ditës së enjte. "Sot, më datë 11.07.2019, dorëzuam në Gjykatën Administrative të Apelit padinë kundër Këshillit të Ministrave, me objekt shfuqizimin e Vendimit nr. 389/ 2019, për pjesën që anulon pasaportat e shërbimit të gjyqtarëve të Shkallës së Parë dhe të Apelit dhe për pjesën që heq të drejtën e tyre, të pajisen me pasaporta shërbimi. Dëshiroj të sjell në vëmendje një pjesë nga Vendimi nr. 40/ 2014 të Gjykatës Kushtetuese mbi interpretimin e nenit 138 të Kushtetutës: Paprekshmëria e pagës dhe e përfitimeve të tjera janë ngritur në nivel kushtetues, me qëllim që të drejtat/ përfitimet, të cilat burojnë nga ushtrimi i funksionit të gjyqtarit, të mos ndryshohen me efekt negativ. Formulimi i togfjalëshit ' përfitime të tjera' është i një natyre të përgjithshme dhe nuk konkretizon në mënyrë shteruese rrethin e përfitimeve të gjyqtarëve. Kushtetutëbërësi, jo pa qëllim, e ka lënë të hapur kuptimin që i duhet dhënë rrethit të përfitimeve, pasi ka synuar të përfshijë në tërësinë e të drejtave që gjyqtarët i gëzojnë në funksion të ushtrimit të detyrës së tyre", shkruhet në reagimin e gjyqtarit. Disa muaj më parë, ministri i Jashtëm i deleguar, Gent Cakaj, bëri të ditur që do të bëhen ndryshime në ligjin për pasaportat diplomatike. Cakaj, gjithashtu, kërkoi dorëzimin e 350 pasaportave diplomatike, ndërsa ndryshimet do të bëheshin pasi me këto pasaporta, sipas tij, ishte abuzuar. "Diplomatët të dorëzojnë pasaporta diplomatike dhe ato të shpallen të pavlefshme. Përmirësimi i kuadrit ligjit për pasaportat diplomatike po bëhet për t'i kthyer identitetin asaj, por i dërgoj menjëherë qeverisë VKM që të kalojë këtë ligj", tha Cakaj.