Anëtari i KLP sërish në hetim, Kolegji shqyrton denoncimin
Kolegji i Posaçëm i Apelimit nisi shqyrtimin e ankimit të Komisionerit Publik ndaj konfirmimit në detyrë të anëtarit të KLP- së, Gentian Osmani. Ky i fundit u konfirmua në detyrë nga shkalla e parë e vetingut, Komisioni i Pavarur i Kualifikimit, rreth një vit më parë. Por ky vendim u pa i gabuar nga Komisioneri, i cili duke u bazuar edhe në një rekomandim të Operacionit Ndërkombëtar të Monitorimit, kërkoi nga Kolegji shkarkimin e Osmanit. Gjatë seancës së djeshme, pas relatimit për kriterin e pasurisë, ku problemi kryesor ishte huaja në shumën 20 mijë euro e marrë në vitin 2009 për blerjen e një apartamenti 1+ 1 në Tiranë nga një i afërm. Marrja e kësaj huaje nuk dokumentohet sipas KP- së, si dhe ka mungesë të dokumentacionit që provon se huadhënësi kishte mundësitë financiare për dhënien e saj. Komisioneri kërkoi shkarkimin e prokurorit, ndërkohë relatoi edhe për një denoncim të ri të ardhur për të, që prekte dy kriteret e tjera. Pretendimet për pasurinë u rrëzuan nga avokati i prokurorit Julian Mërtiri, i cili tha se ashtu siç ishte pranuar nga Komisioni i Pavarur i Kualifikimit, marrja e huasë ishte deklaruar që në vitin 2009. Ai po ashtu paraqiti si prova shkresa të nënshkruara për këtë hua, ndërsa këmbënguli se formalisht dokumentet e paraqitura dhe vullneti i palëve ishin të mjaftueshme për të vërtetuar huamarrjen. Më tej, avokati bëri të ditur se kanë sjellë prova të reja sa i takon mundësisë së personit të lidhur për të dhënë huan. Në fund, KPA pranoi provat e reja të Osmanit dhe hapi shqyrtimin gjyqësor për një denoncim të bërë në adresë të tij.