Përplasje me armë për kanabisin, kapet pas 4 vitesh
BERAT – Një 41- vjeçari i shpallur në kërkim prej vitit 2015 ka përfunduar në prangat e Policisë. I arrestuari është Fatri Ibro, nipi i ish- drejtorit të Policisë së Qarkut të Beratit, Ajet Ibro. Fatri Ibro është arrestuar për një ngjarje të ndodhur në tetor 2015, në fshatin Vërcisht të Përmetit, ku bashkë me vëllezërit e tij, Gazmor dhe Ilirja Ibro, u qëllua me automatik nga një grup personash, teksa po transportonin 100 kg marijuanë. Vëllezërve Ibro iu bë pritë nga katër persona, konkretisht Roland Pata, Altin Merdani, Stefan Gjoka dhe Elton Abazaj. Këta të fundit, të armatosur me automatikë, kanë pasur për qëllim grabitjen e sasisë së lëndës narkotike që po transportohej nga Skrapari drejt Përmetit. Sipas dëshmive të banorëve të Vërcishtit, shkëmbimi i zjarrit ka zgjatur gati 30 minuta. Për pasojë, një prej vëllezërve Ibro mbeti i plagosur. I lënduar me armë zjarri mbeti Grazmor Ibro, 43 vjeç. Ai u dërgua me helikopter për në Spitalin e Traumës në Tiranë, ku iu komunikua dhe masa e arrestit. Lajmërimin për ngjarjen, Policia e mori nga banorë të zonës, të cilët u terrorizuan nga shkëmbimi i zjarrit. Në përfundim të operacionit, Policia sekuestroi sasinë prej 100 kg marijuanë e fshehur në 16 thasë dhe arrestoi katër persona, ndërsa katër të tjerë u shpallën në kërkim. Përveç këtyre, Policia sekuestroi edhe tri automjetet e të arrestuarve, si dhe gëzhoja automatike e pistolete në vendngjarje. Gjatë kontrollit në banesat e personave që u bënë pritë vëllezërve Ibro, Policia gjeti dhe një sasi të vogël kokainë dhe hashashi.