Aktorët për “Jul Qezarin”: Shfaqja, më e fortë se protestat
“Njerëzit do shikojnë se si një lider aq i dashur fillon dhe shkatërron, duke menduar se e bën për të mirën e popullit”
“Jul Qezari” i Ivica Buljan do të sjellë një këndvështrim tjetër të Shekspirit, edhe për shkak të hapësirës së përzgjedhur.
Si në teatrot e improvizuar mesjetarë, skena e kësaj shfaqjeje do të bëhet sheshi i Teatrit Kombëtar. Ervin Bejleri, që do të interpretojë në rolin e Brutit, si dhe aktori Alfred Trebicka, e thonë shkoqur se një shfaqje e tillë, e paprecedent për publikun kryeqytetas do të bëjë zhurmë. “Përsa i përket impaktit që do të ketë në publik, do të jetë edhe më i madh sesa dhjetë protesta, nuk ka rëndësi të opozitës apo pozitës. Për këtë s’mund të bëjë një ndarje. Njerëzit do të shikojnë se si një lider aq i dashur për popullin fillon edhe shkatërron, madje është verbuar aq shumë saqë mendon se e bën diçka të tillë, deri edhe ekzekutimin e popullit për të mirën e tij”, shprehet ai.
Ndërsa për Romir Zallën, që luan vetë Qezarin, kjo është një shfaqje që mbështetet mbi të gjitha tek aktori. “Është një shfaqje pa protagonist, por që është bazuar mbi një skuadër të madhe aktorësh që krijojnë spektaklin. Kjo për faktin se mënyra e punës nuk është ajo klasikja. Nuk ka skenografi apo elementë të tjerë klasikë. Është punuar mbi metoda që për ne janë të reja deri diku, për realitetin tonë profesional. Edhe eksperienca ka qenë e jashtëzakonshme në të gjitha etapat e punës. Unë jam partizan i kësaj, sepse teatri është aktori, është veprim edhe energji. Nga kjo vjen edhe emocioni, edhe fabula. Është provokim jo vetëm për hir të fabulës së Jul Qezarit, që është e vjetër sa vetë bota, sepse lufta për pushtet është e vjetër sa vet bota. Më shumë se politikës i flet popullit, njerëzve, sepse janë ata që lejojnë apo jo situata të tilla ekstreme”, shprehet Zalla.
Alfred Trebicka thekson se një përvojë e tillë, në aspektin profesional të çdo aktori, është tepër e vyer. “Është një metodë shumë krijuese në ndërtimin e performancës. Ne që jemi pjesë e këtij vendi edhe e dinamikave politike të tij jemi shumë më të ndjeshëm ndaj këtyre fenomeneve. Shfaqja jonë do të jetë shumë më e mirë se dhjetë protestat e opozitës, apo 35 të tjerat që mund të bëjë, në sensin qytetar. E para, është historia e Jul Qezarit, e dyta, është pena e Shekspirit, e treta është përkthimi i Fan Nolit dhe e katërta prej regjisë së Invicës. Ndërsa e pesta, jemi ne titanët që do të dalim. Ka për të qenë një miting fantastik”, shprehet aktori.
Gent Zeneli, gjithashtu pjesë e kastit, në krye të fjalës së tij thotë se në vepër vrasjet që ndodhin janë në fakt dy. “Kemi vrasjen fizike të Qezarit edhe vrasjen e Republikës, që për mua është shumë e rëndësishme. Asnjëherë në jetën time nuk kam pasur një eksperiencë të tillë, që jo më shumë se dy apo tri herë kemi pasur një skuadër me policë, që bëheshin gati për të përballuar situatën. Kjo qasje që pati vepra me situatën e Ballkanit edhe me trazirat që po ndodhin ka qenë një ngjarje fenomenale. Edhe jam i lumtur që “Jul Qezari” po vihet. Njerëzit duhet që të vijnë të shikojnë këto dy vrasje edhe mesazhin, që populli e vret këtë lider edhe vendos se kush do ta udhëheqë. Ky katarsis që pëson turma e manipuluar nga Marc Anton është një shfaqje, që çon mesazhe shumë të forta”, thotë aktori.