Britania shpëton anijen që po bllokonin iranianët
Javad Zarif: Nuk donim ta bllokonim, pretendimet janë të pavlera
SHBA planifikon të bashkohet me Britaninë për të siguruar mbështetje detare për anijet cisterna të naftës që kalojnë përmes Gjirit, duke kryer kështu një nga hapat e para ushtarake në konfliktin SHBA- Iran, që nisi me largimin e administratës Trump nga pakti bërthamor.
Një gjeneral i lartë amerikan e bëri lajmërimin pasi Marina e Mbretërisë së Bashkuar u detyrua të mbrojë anijet britanike nga një anije iraniane. Incidenti vjen pasi Policia e Gjibraltarit ka arrestuar kapitenin dhe kryeoficerin e një tankeri iranian nafte, i cili është konfiskuar nga “Royal Marines” pranë hapësirës britanike, javën e kaluar. Ndaj të arrestuarve, të dy shtetas indianë, nuk janë ngritur akuza. Gjenerali Mark Milley, i emëruar për t’u bërë kryetar i Shefave të Përbashkët të Shtabit, tha në një seancë dëgjimore të Senatit amerikan se SHBA ka një rol vendimtar në mbrojtjen e lirisë së lundrimit në Gjirin Persik. Sipas tij, SHBA po përpiqej të bashkonte një koalicion në drejtim të sigurimit të përcjelljes ushtarake detare të anijeve tregtare. “Mendoj se kjo do të zhvillohet gjatë javëve të ardhshme”, tha ai. Anija iraniane “Grace 1” u ndal, ndërsa përpiqej të hynte në Mesdhe, pasi shkeli sanksionet e BE- së ndaj Sirisë, duke shkaktuar tensione mes Londrës dhe Teheranit. Më pas, tri anije iraniane u përpoqën të pengonin “British Heritage” me flamur të Britanisë së Madhe, ndërsa lundronte përmes Ngushticës së Hormuzit, duke urdhëruar që të ndryshonte kursin dhe të ndalet. Por fregata e Marinës Mbretërore, “HMS Montrose” drejtoi armët tek anijet iraniane dhe i paralajmëroi të largohen. Ata u tërhoqën pa krijuar konflikt. Po ashtu, edhe helikopteri i “Wildcat” i “Montrose” u aktivizua duke fluturuar sipër anijeve iraniane. “’ HMS Montrose’ u detyrua të pozicionohej midis anijeve iraniane dhe britanike dhe të jepte paralajmërime verbale për anijet iraniane, të cilat më pas u kthyen”, tha një zëdhënës i qeverisë britanike në një deklaratë. Britania ka lëshuar udhëzime për anijet e saj tregtare që lundrojnë në Ngushticën e Hormuzit. Ministri i Jashtëm i Iranit, Mohammad Javad Zari, f i hodhi poshtë si të pavlera pretendimet britanike, se Irani kishte kërkuar të bllokonte anijen e tyre. Ndërkohë, një zëvendëskomandant i Gardës revolucionare të Iranit paralajmëroi Britaninë se “armikut do t’i vijë keq që mbajti cisternën tonë të naftës”. “HMS Montrose” është në një mision trevjeçar në objektin e marinës britanike në Bahrein, qendër e operacioneve të saj detare në lindje të Kanalit të Suezit. Rusia dhe Kina, si nënshkruese të marrëveshjes bërthamore, ( bashkë me Britaninë, Francën dhe Gjermaninë), kërkuan përmbajtje nga palët.