Celibashi i jep të drejtë PD: Kërkesa për listën e zgjedhësve, legjitime
Ish- kreu i Komisionit Qendror të Zgjedhjeve dhe ish- ministri socialist, Ilirjan Celibashi, deklaron se zgjedhjet e mbajtura në 30 qershor nuk ishin një proces, për të cilin shqiptarët duhet të mburren. Sipas tij, raporti i ODIHR do të japë një opinion më të saktë të situatës për shkak se vëzhguesit e saj i kanë bërë një fotografim më të qartë situatës. “ODIHR është një institucion i besueshëm për të gjithë spektrin politik dhe opinionin publik shqiptar. Raporti është realist, e ka fotografuar shumë mirë situatën në Shqipëri. Këto nuk janë zgjedhje, për të cilat ne duhet të krenohemi dhe të themi që këto ishin zgjedhjet që i japin një notë pozitive procesit zgjedhor apo në përgjithësi procesit të integrimit. Por, duke parë situatën si u zhvillua, nuk mund të pritej e s’mund të bënte më shumë. ODIHR e sheh procesin në tërësi dhe për këtë me siguri do të ketë kritika”, tha Celibashi. Ishkreu i KQZ- së tha se kërkesa e opozitës në institucionin e administrimit të zgjedhjeve ka legjitimitet, dhe Kodi Zgjedhor ia jep këtë të drejtë, përfshi edhe ata që nuk janë subjekt zgjedhor. “Për aq sa unë jam njohur me kërkesën e PD- së, mund të them se kjo kërkesë ka legjitimitet, ka kërkuar informacion nga komisionet më të ulëta, është një dokumentacion që Kodi Zgjedhor ia jep të drejtën, përfshi edhe ata që nuk janë subjekt zgjedhor, që ta marrin këtë dokumentacion dhe të konsultohen me këtë dokumentacion kundrejt një procedure të caktuar, që ka të bëjë me protokollin. Nuk shoh pengesë ligjore për mosdhënien e këtij dokumentacioni”, theksoi Celibashi. Duke u ndalur në vendimin e Kolegjit Zgjedhor, Celibashi tha se me rrëzimin e kërkesës së drejtuar nga Partia e drejtuar nga Idajet Beqiri, indirekt u rrëzua edhe dekreti i Presidentit të Republikës. “Kolegji në substancë tha se KQZ ka vepruar drejt, pra indirekt e rrëzoi dekretin e Presidentit të Republikës, duke thënë që procesi zgjedhor është duke u zhvilluar në përputhje me parashikimet e Kodit Zgjedhor, por dekreti, në vetvete, shqyrtimi i dekretit dhe i ligjshmërisë së tij nuk është kompetencë e Kolegjit Zgjedhor dhe as e KQZ. Por duke qenë një akt absolutisht i pavlefshëm që nuk prodhon asnjë pasojë juridike, pak e vështirë për t’u kuptuar për opinion, kështu ka konsideruar KQZ dhe Kolegji”, u shpreh ish- kreu i KQZ.