Ish- deputeti Spahia, përgjigje Topallit: Një demokrat i vërtetë s’pranon diktaturën
Ish- deputeti demokrat, Bardh Spahia, pak ditë pas heqjes së masës “Arrest shtëpie”, ka rrëfyer ndjesitë e ditëve të izolimit pas arrestimit që iu bë nga Polica e Shtetit. Në një intervistë për emisionin “Kjo Javë” në “News 24”, Spahia paralajmëron një padi për arrestim politik dhe të paligjshëm ndaj tij. “Do t’i shkoj kësaj çështjeje deri në fund, pastaj do të jenë organet kompetente që do të nxjerrin përgjegjësitë e kujt kanë qenë. Këtë nuk e bëj për vete, e bëj më shumë edhe për ata qindra aktivistë të PD- së, mbështetës, protestues, që janë ndaluar e mbajtur në mënyrë të padrejtë nga strukturat e rendit të influencuara e të drejtuara politikisht apo të përdorura politikisht nga kundërshtarët tanë”, tha Spahia. Ish- deputeti i PD- së ka sqaruar edhe atë që ndodhi në KZAZ- në e Shkodrës, për të cilën u kërkua edhe arrestimi i tij. “Pati një përdorim të turpshëm të Policisë së Shtetit, e cila, në shkelje të plotë të ligjit, duke mbështetur edhe grupe kriminale të njohura në qytet, tentoi të merrte ambientet në pronësi të Bashkisë Shkodër, në shkelje të plotë të ligjit dhe u krijuan ato situata. Ka qenë një grup i forcave speciale të Policisë, që kanë sulmuar ambientet e shkollës, të cilat janë në pronësi të Bashkisë Shkodër dhe në atë moment ka pasur një reagim nga një grup qytetarësh shkodranë. Ne u lajmëruam për këtë incident dhe sigurisht, me ndjenjën e plotë të përgjegjësisë, u nisëm me shpejtësi për t’u gjendur afër në një situatë të tillë. E gjithë sjellja jonë ka qenë për qetësimin e situatës. Ajo pjesë e ndalimit ishte publike, absurde, që në momentin kur u tha në lidhje live, isha i vetëdijshëm që e ka vendos Kryeministri. Fakt është që psikologjikisht e prisja, por e ndieja veten qytetar të lirë”, u shpreh Spahia. Ish- deputeti i është përgjigjur edhe ish- nënkryetares së PD- së, Jozefina Topalli, që në një reagim pas ngjarjes në Shkodër, deklaroi se një demokrat i vërtetë nuk djeg shkolla. “Një demokrat i vërtetë nuk pajtohet me grushtin e shtetit apo me votimet farsë. Shkodranët e vërtetë, demokratët e vërtetë, i kanë thënë jo 30 vjet përpara, janë përballur madje- madje me sakrifica të jashtëzakonshme me diktaturën më të egër ndoshta në botë, pikërisht për të fituar të drejtën e votës së lirë, të drejtën e zgjedhjes dhe në këtë kontekst unë mendoj se qytetarët shkodranë janë më të vendosur se kushdo për të mos e lënë vendin të rrëshqasë drejt diktaturës, për të mos e lënë vendin të rikthehet votimeve pa zgjedhje”, tha ish- deputeti.