Balla: Meta drejtues i opozitës, zgjedhjet në vitin 2021
“Të gatshëm të dialogojmë me PD, s’negociojmë Reformën në Drejtësi”
Kryetari i Grupit Parlamentar të Partisë Socialiste, Taulant Balla, akuzoi Presidentin e Republikës se është kthyer në drejtuesin kryesor të opozitës.
Gjatë një takimi me strukturat e PS- së në Bashkinë e Belshit, Balla tha se Presidenti Ilir Meta ka bërë një shkelje të rëndë, duke anuluar zgjedhjet e 30 qershorit, gjë për të cilën do të shkarkohet dhe procesi do të certifikohet nga Gjykata e re Kushtetuese, e cila do të jetë gati në shtator. “Ata që dalin çdo natë në TV, nga Presidenti që tashmë është një nga drejtuesit e opozitës në Shqipëri apo kushdo tjetër, duhet ta dinë që zgjedhjet vendore u përmbyllën në 30 qershor. Ishte një ditë e rëndësishme ku fitoi Shqipëria e institucioneve, Shqipëria e zbatimit rigoroz të Kushtetutës, fitoi Shqipëria e angazhimit europian, përkundër Shqipërisë së dhunës dhe të molotovëve”, tha Balla. Sipas tij, shkarkimi i Presidentit Meta do të shkojë në Gjykatën Kushtetuese, e cila do të jetë funksionale në muajin shtator. “Ne do të vazhdojmë edhe me hetimin e shkeljes së Kushtetutës nga ana e Presidentit të Republikës. Ilir Meta ka bërë një akt të rëndë, i cili duhet hetuar dhe më pas, nëse komisioni do të konkludojë që shkelja është e rëndë, sipas nenit 90 të Kushtetutës do të shkarkohet dhe procesi do të certifikohet nga Gjykata e re Kushtetuese, që në shtator do të jetë gati për të ushtruar këtë detyrë të rëndësishme”, deklaroi Balla. Duke folur për situatën politike, numri dy i PS- së, Balla, tha se Partia Socialiste është e gatshme për dialog me aktorët e tjerë politikë për çështje të rëndësishme të vendit, por asnjëherë nuk negociohet implementimi i Reformës në Drejtësi. “Ne jemi të gatshëm në çdo moment të dialogojmë dhe të diskutojmë me Partinë Demokratike rrugore, por, pikë së pari, me ata që kemi në Kuvend, pikërisht për sfidat e rëndësishme të vendit, por këtu nuk përfshihet asnjë lloj negociate për Reformën në Drejtësi”, tha kreu i Grupit Parlamentar Socialist. Ai garantoi socialistët se zgjedhje para vitit 2021 nuk do të ketë në Shqipëri. “Është bërë zakon që sa herë mbaron një fushatë, duhet të mendojmë për betejën e radhës. Beteja jonë e radhës janë zgjedhjet e përgjithshme të vitit 2021, zgjedhje të tjera nuk ka më”, tha Balla. Këto deklarata, kreu i Grupit Socialist i bëri gjatë analizës së zgjedhjeve të 30 qershorit në Bashkinë e Belshit. Në faqen e tij në “Facebook”, Balla shkruan se “qytetarët e Belshit vlerësuan vëmendjen dhe punët e mëdha transformuese që qeveria Rama në këto 4 vite ka bërë në Belsh, por për ne objektivat e radhës janë edhe më të rëndësishme, siç është investimi për ujësjellësin e ri, i cili shumë shpejt do të nisë dhe po ashtu puna e mëtejshme që duhet bërë për zhvillimin e agroturizmit”.