Çfarë mund të bisedohet mes Presidentit francez e politikanëve në Beograd
Vizita e Presidentit francez në Serbi shihet si një tregues se Macron ka vendosur të bëjë Beogradin qendrën rajonale për Europën. Gjatë vizitës së tij, e cila nis këtë të hënë, Macron dhe Vuçiç pritet të nënshkruajnë rreth 20 marrëveshje, sipas mediave serbe. Ndërsa mediat franceze kanë shkruar se temat kryesore të takimit Macron- Vuçiç do të jenë anëtarësimi i Serbisë në BE, problemet e marrëdhënieve me Kosovën, si dhe bashkëpunimi ekonomik. "Paris Express" shkruan për marrëdhëniet mes Serbisë dhe Kosovës, që pritet të jetë në qendër të vëmendjes që pas dështimit të samitit të Parisit. Agjencia "AFP" e vë theksin te dialogu i ndërmjetësuar nga BE- ja mes Beogradit dhe Prishtinës, i cili ka ngrirë prej disa muajsh. "Parisi është i hapur për shkëmbimin e territoreve dhe përkundër Berlinit, i cili druhet se kjo do të hapte ' kutinë e Pandorës'", shkruan kjo medie. Tri gazeta të tjera të mëdha, "Express", "West- France" dhe "Le Figaro" shkruajnë se Macron do të flasë edhe për aspiratën e Serbisë për t'u bërë anëtare e Bashkimit Europian. "Presidenti Macron mbështet perspektivën europiane të Ballkanit, por edhe e ka bërë të qartë se anëtarësimi do të pasojë vetëm pas ristrukturimit të BE- së". Mediat franceze kujtojnë edhe "keqkuptimin, kur gjykata franceze në 2017 refuzoi kërkesën e Beogradit që ta ekstradojë Kryeministrin e Kosovës Ramush Haradinaj, i cili ishte arrestuar në Francë e që në Serbi është i akuzuar për krime lufte". Po ashtu, "WestFrance" kujton se marrëdhëniet e Francës me Serbinë i krisën në këtë moment, ndërsa "Figaro" shkruan se këto incidente kanë shkaktuar shumë pakënaqësi në Serbi.