Basha premton një projekt ndryshimi: Do japim zgjidhjet tona
"Në 30 qershor refuzim për Guiness, Edi Ramën e braktisën edhe socialistët e ndershëm"
Refuzimi që shqiptarët u bënë zgjedhjeve të 30 qershorit, për kryedemokratin Lulzim Basha ka qenë një përgjegjësi dhe motivim akoma më i lartë për t'u dhënë shqiptarëve projekt për ndryshimin e vërtetë të vendit.
Në një takim informal të zhvilluar me strukturat e PDsë në Shkodër në kuadër të një aksioni riorganizimi të brendshëm, Basha foli për një program që do t'u japë shqiptarëve shpresë dhe besim. "Me refuzimin rekord për librat Guiness, prej 94% e qytetarëve që refuzuan jo vetëm farsën e 30 qershorit, por edhe regjimin e hajnave dhe kriminelëve të Edi Ramës. Jam këtu për t'u thënë të gjithë shkodranëve se për mua, Partinë Demokratike dhe për opozitën, refuzimi i Edi Ramës dhe regjimit të tij në 30 qershor, shumica ' Rama Ik', është mbi të gjitha motivim dhe përgjegjësi për ta kthyer këtë votë masive për largimin e këtij regjimi antikushtetues, antipopullor dhe antikombëtar në një votë shprese dhe besimi për një projekt ndryshimi të vërtetë, ndryshimi të qëndrueshëm. Ndryshimi s'mund të vijë vetëm me fjalë. Ndryshimi do të vijë vetëm me garanci, ndryshime kushtetuese, zgjedhore dhe politike që do t'i paraprijnë një transformimi të thellë, në radhë të parë të ekonomisë, që është edhe plaga më e rëndë e Shkodrës dhe e gjithë Shqipërisë dhe po kështu një transformimi të thellë dhe modernizues për vendin", tha Basha.
ARSYET
Për kreun e opozitës, zgjedhjet e 30 qershorit ishin një test i vërtetë për të kuptuar se Edi Ramën e kanë braktisur edhe vetë socialistët. "Sepse e kuptoi, që siç thotë edhe raporti i OSBE- ODIHRit, 30 qershori nuk ishte për popullin, madje nuk ishte as për PS- në. 30 qershori ishte për Edi Ramën dhe për kriminelët e hajdutët që qeveris. 30 qershori ishte për Paulin Stërkajn, për Ymer Lalën, Emiljano Shullazin, për Damian Gjiknurin, për Ulsi Manjën. Shkurt, 30 qershori ishte për një grusht njerëzish që sot duhet të ishin në burg, jo në politikë. Arsyeja e dytë ka të bëjë me faktin se kriza ekonomike në vend ka arritur një pikë të paimagjinueshme. Njerëzit janë keq për bukën e gojës. Kjo situatë ka një shkaktar dhe një përgjegjës, që ka marrë gjithë pasuritë dhe ekonominë e vendit dhe ua ka dorëzuar 5 oligarkëve dhe 5 kriminelëve, me të cilët pastron dhe ndan bashkë fitimet. Ky është ' babloku i madh' që i thotë Ymer Lala. Është ' babloku i madh' për kriminelët dhe oligarkët, por jo për popullin. Kriza ekonomike ka një shkaktar dhe ky është Edi Rama. Arsyeja e tretë pse ndodhi 30 qershori është për shkak të rezistencës sonë. Qëndresa jonë ka arritur dy gjëra: ka vetëdijesuar shqiptarët dhe u ka vrarë frikën shqiptarëve", theksoi kreu i PD- së. Për Lulzim Bashën, energjia e marrë në 30 qershor nuk lidhet vetëm me largimin e Edi Ramës, por me përgjegjësinë për të ofruar një transformim të vërtetë. "Përgjegjësia jonë tani është ta marrim këtë energji të 30 qershorit dhe ta transformojmë në një energji për ndryshimin e Shqipërisë. Ky është premtimi për shqiptarët, jo thjesht largimi i Edi Ramës. Moralisht dhe politikisht, ai është i rrëzuar. Detyra jonë kryesore është që kësaj shumice të 30 qershorit t'i japim formën dhe dimensionet e shumicës qeverisëse nëpërmjet zgjedhjeve të lira e të ndershme, që mbeten objektivi kryesor i lëvizjes që filluam së bashku me 16 shkurt. Nuk mjafton të themi se kjo është pasojë e qeverisjes së dështuar, të papërgjegjshme, të korruptuar dhe kriminale të Edi Ramës. Tani është koha të japim zgjidhjet tona", deklaroi Basha.
Ndryshimi do të vijë vetëm me garanci, ndryshime kushtetuese, zgjedhore dhe politike që do t'i paraprijnë një transformimi të thellë, në radhë të parë të ekonomisë, që është edhe plaga më e rëndë e Shkodrës dhe e gjithë Shqipërisë