Shpërthen bombola e hidrogjenit në Bllok, pesë të plagosur
Të dëmtuar çifti i bashkëshortëve, punonjësja e dy kalimtarë
Një shpërthim i fuqishëm që shkaktoi plagosjen e 5 personave ndodhi mesditën e djeshme në një argjendari në zonën e ish- Bllokut.
Të plagosur mbetën pronarët e argjendarisë, bashkëshortët Sokol e Alma Pirra, 52 e 53 vjeç, punonjësja e tyre, Eneda Nura, 18 vjeç, si dhe dy kalimtarë të rastit, 23 e 24 vjeç. Policia e Tiranës fillimisht njoftoi se ngjarja kishte ndodhur nga shpërthimi i një bombole gazi në një dyqan eventesh në rrugën "Vaso Pasha", por nga verifikimet e kryera në vendngjarje u zbulua vatra e zjarrit. Rezultoi se shpërthimi kishte ndodhur në argjendari, shumë pranë një karburanti. Nuk bëhej fjalë për një bombol gazi si ato të gatimit, por bombol hidrogjeni. Forca të shumta policie rrethuan vendngjarjen rreth orës 13: 20 e më pas zjarrfikësit nxituan të mbanin nën kontroll situatën, që mund të kishte shkaktuar edhe ndonjë tragjedi në rast se zjarri do të përhapej më shumë. Burimet thanë se situata ishte alarmante, jo vetëm për shkak të karburantit që ndodhej afër, por edhe sepse pranë ishin depozitat e vajit të ashensorit të pallatit ku ndodhej argjendaria, duke rrezikuar përhapjen e flakëve. Bashkëshortët Sokol e Alma Pirra u transportuan në QSUT, në Repartin e Djegie Plastikës, pasi kishin djegie në pjesë të ndryshme të trupit. Megjithatë, mjekët thanë se gjendja shëndetësore e tyre është e stabilizuar. Ndërsa në Spitalin e Traumës u transportua me urgjencë punonjësja e argjendarisë, Eneda Nura, dhe dy kalimtarët. Këta të fundit, pasi morën mjekimin e nevojshëm, u larguan nga spitali, ndërsa për 18- vjeçaren Nura mjekët e panë të nevojshme që të qëndronte për ndihmë më të specializuar. Shpërthimi ka qenë i fuqishëm, ndërsa forca të shumta të Policisë dhe Zjarrfikëses pasi rrethuan zonën, bënë evakuimin e banorëve, për t'i mbajtur larg gazrave që çliroheshin nga djegia dhe flakët që vazhdonin të dilnin nga kati i parë i pallatit. Zjarri ka dëmtuar edhe biznese të tjera që ndodheshin pranë argjendarisë. Ndërsa për shkak të shpërthimit, në një diametër të gjerë janë shpërndarë materiale inerte, të cilat fatmirësisht nuk dëmtuan persona të tjerë. Ndërhyrja ka qenë e vështirë për ekipet e shpëtimit, të cilët herë pas here janë ndërruar për shkak të problemeve me frymëmarrjen. Menjëherë është ngritur grupi hetimor me oficerë të Policisë, zjarrfikës dhe prokurorin e gatshëm, për të zbuluar shkaqet e shpërthimit.