"Metën e hetojnë personazhet kryesorë të dosjes ' 184' e ' 339'"

Partia Demokratike e cilëson Komisionin Hetimor për shkarkimin e Presidentit të Republikës, Ilir Meta, si një përpjekje të Edi Ramës për të larguar vëmendjen nga skandalet e qeverisë. Por për Sekretarin e Çështjeve Ligjore në PD, Çlirim Gjata, skandal për procesin e paligjshëm të shkarkimit të kreut të shtetit është edhe përbërja e komisionit në radhët e maxhorancës. "Skandali qëndron te vetë përbërja e Komisionit Hetimor, pra, tek ata deputetë që do të vendosin shkarkimin e Presidentit të Republikës. Përpara se të ndodhë kjo, Edi Rama duhet t'u shpjegojë shqiptarëve se kush do ta hetojë Presidentin e Republikës. Do ta hetojë Ilir Ndrazhi, i cili është përfaqësuesi politik ose krahu politik i bandës së Abdylajve, të cilin Abdylajt e kishin vënë në listë me numër rendor dhe i premtonin se do fitonin edhe 10 me 0 madje, dhe ky person i vendosur nga kjo bandë do të votojë shkarkimin e Presidentit të Republikës. Kush është kryetari i Komisionit Hetimor? Ulsi Manja i dosjes ' 184', që Zoti e ruajttë me ç'kanë dalë nga përgjimet e ' Bild'- it, ku mjafton lidhja e tij me bandat e Dibrës, me shefa komisariatesh, me drejtorë arsimorë e me turli lloj të tillë, të organizuar në krim, për të vjedhur dhe për të blerë vota. Ky njeri, pra, do të hetojë dhe do të vendosë për shkarkimin e Presidentit të Republikës", tha Gjata. Sekretari për Çështjet Ligjore në PD kujtoi se qëllimisht maxhoranca ka zgjedhur që hetimin për kreun e shtetit ta bëjnë personazhet kryesorë të dosjes "184" dhe "339" të blerjes së zgjedhjeve. "Për Presidentin e Republikës do të vendosë Jurgis Çyrbja, përfaqësues politik i Bandës së Shullazit, që i thoshte Shullazit se ' po na bëjnë hetime' dhe i kërkonte të ndërhynte për të ndaluar hetimet. Një tjetër që do të vendosë për Presidentin e Republikës është Rrahman Rraja. Të gjithë e dimë skandalin e tij të fundit. Do të vendosë Luan Harusha, përfaqësuesi i bandës së Bajrajve, apo Damian Gjiknuri, që do të pastronte 30 milionë euro për llogari të Edi Ramës, duke falsifikuar dokumente zyrtare të qeverisë amerikane. Pra, aktorët kryesorë të këtij komisioni janë personazhet e dosjeve ' 184' dhe ' 339' të blerjes së zgjedhjeve apo të lidhjes dhe bashkëpunimit me krimin e organizuar", tha sekretari i PD- së. Gjata i kujtoi Kryeministrit Rama se përmes propagandës së tij, nuk do të mundë të gënjejë shqiptarët. Në pozitat e juristit, Sekretari Ligjor i PD-- së theksoi se Presidenti nuk ka kryer asnjë shkelje, por ka ushtruar kompetencën e tij kushtetuese për t'u garantuar qytetarëve të drejtën e zgjedhjes, të drejtën kushtetuese për të zgjedhur.