Transaksionet me arin, Meta kthen në Kuvend projektligjin
"Rrezik publik që vjen nga shpërdorimi i pushtetit vendimmarrës"
Presidenti i Republikës, Ilir Meta, i ktheu mbrëmë maxhorancës një tjetër ligj për rishqyrtim në Kuvend.
Me dekretin 11225, kreu i shtetit ka kthyer mbrapsht ligjin për rezervat materiale të shtetit, për të cilin opozita tha se me ndryshimin e ri, Kryeministri Edi Rama merr të drejtën e blerjes së arit në Shqipëri. Në arsyet e kthimit të ligjit, Presidenti Meta deklaron se nisma ligjore për ndryshimin e nenit 10, pika 1 të ligjit nr. 9900, datë 10.4.2008, "Për rezervat materiale të shtetit", është e pajustifikuar. Sipas tij, dispozitat e ligjit të miratuar nr. 36/ 2019 "Për një ndryshim në ligjin nr. 9900, datë 10.4.2008, "Për rezervat materiale të shtetit", përbëjnë rrezik të shtuar për cenimin e interesit publik, që mund të vijë nga keqadministrimi dhe shpërdorimi i pushtetit vendimmarrës për lëvrimin e mallrave të rezervave të shtetit, pjesë e grupit A. "Për këto arsye, në bindje të Kushtetutës dhe në ushtrim të së drejtës të parashikuar në pikën 1 të nenit 85 të saj, kam vendosur kthimin e ligjit nr. 36/ 2019 ' Për një ndryshim në ligjin nr. 9900, datë 10.4.2008', ' Për rezervat materiale të shtetit' për rishqyrtim në Kuvendin e Shqipërisë", shprehet Presidenti në argumentet e tij.
ARGUMENTET Në ligjin e ndryshuar, qeveria kërkonte që të gjitha mallrat e Grupit A, të cilat deri tani kanë qenë në kompetencë të Këshillit të Ministrave për të vendosur lëvrimin e tyre, nëpërmjet këtij ndryshimi ligjor, propozohen që ato të lëvrohen me akt individual të Kryeministrit me propozimin e ministrit. Sipas kreut të shtetit, "nisur nga rëndësia dhe vlera që kanë mallrat e Grupit A të rezervave të shtetit, është në interes të publikut të gjerë që kontrolli ndaj çdo veprimi administrativ mbi këto mallra të jetë maksimal dhe jo një marrëdhënie midis dy autoriteteve politike Ministër - Kryeministër, ku pa dyshim kjo marrëdhënie varësie midis tyre ( Kryeministër- Ministër) mund të ndikojë drejtpërdrejt në objektivitetin e vendimarrjes". Presidenti shprehet se vendimmarrja mbi mënyrën e administrimit të mallrave të Grupit A, duhet t'i lihet Këshillit të Ministrave, siç është konsoliduar me ligj tashmë prej 11 viteve. Kreu i shtetit vlerëson se "ndryshimet ligjore të miratuara me ligjin nr. 36/ 2019 dobësojnë mekanizmat e kontrollit mbi këtë proces, si dhe ulin nivelin vendimarrës mbi mënyrën sesi këto mallra do të administrohen dhe qarkullojnë në vijim, duke krijuar kështu një rrezik të shtuar, që interesi publik të cenohet".