Rama prezanton kreun e ri të Tatimeve, apel bizneseve
"Nëse nuk lëshon një kupon në një lokal, ai të mbyllet"
Delina Ibrahimaj është kreu më i ri i Tatimeve. Nga ambientet e Kryeministrisë, Kryeministri Rama prezantoi Ibrahimajn si drejtuesen e re, e cila zëvendëson në këtë detyrë Enton Duron.
"Kemi vendosur të ndryshojmë drejtuesin e përgjithshëm dhe zonja Ibrahimi, që deri dje ka drejtuar INSTAT- in, do drejtojë Tatimet, por ky është vetëm fillimi i një procesi ndryshimesh në të gjithë hierarkinë, bazuar vetëm mbi një faktor, rezultati. Rezultati ka qenë pika kyçe për drejtuesin e deridjeshëm. Rezultati është pika kyçe për drejtuesen e re", tha Kryeministri, i cili që në nisje të fjalës së mbajtur nuk fshehu pakënaqësinë për performancën e tatimeve. Ndërsa bëri me faj klimën politike për rritjen e shifrave të informalitetit Rama drejtoi gishtin e akuzës edhe ndaj punonjësve të administratës tatimore. "Jemi në kushtet kur dhënia dhe marrja e kuponit është rikthyer në nivelet më të ulëta përpara sesa të niste lufta shumë e vështirë, por e domosdoshme kundër informalitetit. Kjo është përgjegjësi e drejtpërdrejtë e administratës tatimore për t'u adresuar në mënyrë sistematike dhe pa asnjë tolerancë, ashtu sikundër është përgjegjësi e drejtpërdrejtë e po kësaj administrate që në këtë drejtim të mos kthehet mbrapa në praktikat dhe sjelljet e shëmtuara agresive të së shkuarës".
INFORMALITETI Informaliteti, sipas Kryeministrit, është i pranishëm edhe në tregun e punës. Përkundrejt shifrave të papunësisë që i lexoi në rënie, kreu i qeverisë tha se numri i personave që punojnë në të zezë ka njohur rritje. "Informaliteti ka prekur përsëri në mënyrë të ndjeshme edhe tregun e punës. Sot kemi aktualisht shifrën më të ulët historike të papunësisë, pas më shumë se 2 dekadash, 12.1%, ndërkohë që kemi një rritje të frikshme të informalitetot në punë, përsëri. Kjo duhet të jetë, po ashtu, një pjesë thelbësore e shqetësimit të përditshëm dhe e veprimit të përditshëm të Tatimeve, në bashkëpunim të ngushtë me Inspektoratin e Punës, por përsëri, e theksoj, duke ndërtuar një veprim të mirëstrukturuar larg çdo shfaqjeje agresiviteti dhe arbitrariteti në dëm të biznesit". Edhe më alarmuese paraqitet situata kur bëhet fjalë për 15 mijë biznese, të cilat, edhe pse me status aktiv nuk raportojnë në kasë duke operuar në informalitet. Në takimin me drejtuesit e Tatimeve, Kryeministri ashpërsoi tonet kur bëri të qartë se do të përballen me largim nga puna përgjegjësit. "Sot, dua ta nënvizoj me forcë atë që shumëkush ndër ju këtu e ka dëgjuar më shumë se një herë nga ministrja dhe nga zv/ kryeministri, kush nuk arrin indikatorët, nuk mund të jetë më pjesë e kësaj administrate, as të Tatimeve, as të Inspektoratit të Punës. A më thotë dot këtu dikush nga ju, si mundet të pranohet, sot që flasim, që të kemi 15 mijë kasa joraportuese në biznese që figurojnë aktive nga 112 mijë të tilla? Janë një faktor risku numër një. Kush e mban përgjegjësinë për këto? Kujt i kërkohet përgjegjësia çdo ditë lidhur me këtë?". Të gjitha këto pritet të marrin zgjidhjen me faturën elektronike, që pritet të prezantohet së shpejti. "Po punojmë për projektin e fiskalizimit, që së shpejti do të dalë për konsultim publik për faturën elektronike dhe nxjerrjen mbi sipërfaqe të të gjitha transaksioneve në mënyrë transparente, duke kaluar në një model dixhital, ku praktikisht çdo faturë në kohë reale është e monitorueshme dhe merr fund epoka e faturave fundore, thjesht e vetëm si të tilla, por edhe për faturat mes vetë bizneseve. Madje, do të monitorohet nëpërmjet vetë sistemit edhe pagesa e faturës nëpërmjet bankës në mënyrë që të mos ketë fatura fiktive", tha më tej Rama.
APELI NDAJ BIZNESEVE Me tolerancë zero, kreu i qeverisë u tregua edhe me bizneset duke paralajmëruar me mbyllje, ata të cilët nuk lëshojnë kupon tatimor. "Unë dua ta mbyll me një apel për të gjithë bizneset: Kemi zgjedhur prej më shumë se 6 muajsh një qasje këshilluese, informuese, edukuese, duke mos preferuar të shkojmë te hapi i fundit, pa bërë hapat e tjerë. Kjo periudhë ka përfunduar dhe besoj që legjislacioni është shumë i qartë dhe masat që parashikohen për çdo biznes që nuk punon rregullisht me faturat përkatëse, janë të atilla që nuk ia vlen aventura e moslëshimit të faturës. Dihet që nëse nuk lëshon një kupon në një lokal, të mbyllet lokali, në një njësi tregtare, të mbyllet njësia për një periudhë që sjell një dëm të madh. Kështu që, ju lutem, të gjithëve, mos e sprovoni administratën dhe mos e sprovoni shtetin, sepse nuk do tolerohet askush", apeloi Rama.