PËRZGJEDHJA E ARTISTËVE
Kuratorët, gjithmonë në komunikim me Bordin, por në autonomi të plotë vepruese dhe vendimmarrëse, shqyrtojnë aplikimet dhe përzgjedhin artistët, të cilët do të ekspozohen.
Kuratorët kanë përgjegjësinë të sigurohen mbi autenticitetin e punës dhe respektimin nga ana e artistit të rregullave, ligjeve, të drejtave autoriale dhe të etikës.
Një kohe prej 1 deri në 3 muaj i vihet në dispozicion çdo artisti për të realizuar, përfunduar apo dorëzuar veprën e tij.
Artistët do të ndihmohen dhe drejtohen nga kuratorët për të realizuar një vepër, e cila, e instaluar, do të jetë specifike sipas mundësisë dhe hapësirave të GKK.
Artistët pjesëmarrës do të mbështeten financiarisht në realizimin e veprës.
Do të përdoren ambientet e brendshme të GKK, ato jashtë saj, por dhe hapësira paralele, sipas punës së artistit. Në çdo rast, në ekspozitë paraqitet pasqyra e veprave të ekspozuara jashtë sallës.
Transporti, certifikimi, sigurimi, montimi dhe çmontimi i veprave do të jetë në ngarkim të organizatorëve të ekspozitës dhe nën përgjegjësinë e kuratorëve.
Anëtarët e bordit të jurisë përcaktojnë fituesin vetëm mbasi vepra është ekspozuar në GKK.
“Onufri Re- made” jep vetëm një çmim fitues. Nuk ka çmime inkurajuese apo të karrierës.
Në hapje të ekspozitës shpallet manifesti i “Onufri Re- made” dhe botohet katalogu zyrtar. Në katalog do të publikohen pjesëmarrësit me veprën dhe biografinë e tyre dhe në një pjesë të dedikuar edhe projektet e propozuara nga artistët e tjerë dhe të paekspozuara, por të cilat gjykohen të denja nga Bordi i Jurisë dhe kuratorët.
Ekspozita do të qëndrojë e hapur në ambientet e GKK të paktën 2 javë sipas kalendarit të paracaktuar.