Macron: Duam marrëveshje, do ta bëjmë takimin Kosovë- Serbi
“Jeni shtete europiane, duam që kjo të shndërrohet në fakt”
Presidenti francez, Emmanuel Macron, ka mbërritur të hënën në Beograd për një vizitë dyditore, e cila në Serbi po konsiderohet si një ripohim i miqësinë historike mes dy vendeve.
Macron u prit me nderime të larta shtetërore edhe nga Presidenti Aleksandar Vuçiç në aeroportin “Nicola Tesla”. Vizita po ndodh në një kohë kur u anulua samiti i Parisit, një takim i organizuar për të gjetur zgjidhje për vazhdimin e negociatave drejt një marrëveshjeje gjithëpërfshirëse mes Kosovës dhe Serbisë, i organizuar nga Macron dhe Kancelarja gjermane, Angela Merkel. Fokusi i vizitës pritet të jetë ky. Dhe këtë e ka konfirmuar edhe vetë Macron gjatë konferencës së përbashkët me Vuçiç, ditën e parë të vizitës së tij në Beograd. Duke iu referuar vazhdimit të kësaj iniciative bashkë me Kancelaren Merkel, Macron tha se “Ishim mjaft të hapur në bisedime. Unë do ta organizoj takimin me ju, Kryeministren e Serbisë, lidershipin e Kosovës dhe Kancelaren Merkel”. E më tej, “Franca dëshiron që të kemi një marrëveshje. Kosova dhe Serbia janë shtete europiane dhe duam që kjo të shndërrohet në fakt”, ka thënë Presidenti francez në një konferencë për mediat në Beograd, bashkë me homologun e tij serb. Në qendër të vëmendjes së kësaj vizite do të jenë edhe raportet bilaterale Francë- Serbi. Pritet që të nënshkruhen edhe rreth 20 marrëveshje, mes së cilave, sipas disa mediave në Serbi, edhe hapja e “Euronews” në Beograd. Kjo është vizita e parë zyrtare e një Presidenti francez në Beograd, pas 18 vitesh. Raportet mes Francës dhe Serbisë u ndërlikuan në 25 vitet e fundit, pas bombardimeve të forcave të NATO- s ( ku Franca është anëtare) ndaj Ushtrisë serbe në vitin 1999 dhe njohjes së pavarësisë së Kosovës nga Franca, në vitin 2008. Macron tha se do të ndërrojë faqen në marrëdhëniet me Serbinë.