Legalizimet, skemë e re për aplikimet në 2005 dhe 2006
“Nisur nga koha e aplikimit, trajtimi i këtyre vetëdeklarimeve duhet të ketë përparësi duke proceduar me trajtimin e tyre”
Zbardhet urdhri i kreut të Kadastrës për procesin e legali zimeve. Pse do kenë përparësi shtëpitë e objektet e deklaruara në vitet 2005 e 2006. Si kanë ndryshuar praktikat
Të gjitha vetëdeklarimet e kryera në vitin 2005 dhe 2006 do të trajtohen me përparësi, pa u shkaktuar të tjera vonesa qytetarëve që u është dashur të presin më shumë se një dekadë.
Përmes një urdhri drejtuar zyrave rajonale të ALUIZNI- t, sot Agjencia Shtetërore e Kadastrës, Artan Lame ka kërkuar që të vijohet me shqyrtimin pa radhë të këtyre aplikimeve duke bërë të mundur pajisjen e këtyre familjeve me lejen e legalizimit. “Pranë Drejtorisë së Përgjithshme të ALUIZNI- t, në mënyrë sistematike administrohen kërkesa të subjekteve, të cilët kanë aplikuar për legalizim gjatë viteve 2005 dhe 2006, që kërkojnë konkludimin e procesit të legalizimit. Këto subjekte shprehin shqetësimin mbi tejzgjatjen e procedurave administrative duke moskonkluduar me vendimmarrje nga drejtoritë përkatëse. Nisur nga koha e aplikimit, trajtimi i këtyre vetëdeklarimeve duhet të ketë përparësi duke proceduar me trajtimin e tyre. Respektimi i radhës së paraqitjes së aplikimeve duhej të merrej në konsideratë nga drejtoritë në përmbushje të misionit të saj në zbatim të ligjit, me arsyetimin se është e drejta e subjekteve që kanë aplikuar të parët të marrin shërbimin e kërkuar”, thuhet në shkresën që mban firmën e Lames. Nga drejtoritë rajonale është kërkuar që këto dosje të dalin nga arkiva dhe brenda një periudhe të shkurtër të bëhet i mundur edhe finalizimi i procedurave të legalizimit. “Në rast se gjatë kryerjes së procedurave konstatohet se i njëjti subjekt ka aplikuar më shumë se një herë për të njëjtin objekt, duhet të kryhet procesi i bashkimit të aplikimeve. Për sa më sipër, kërkojmë të merren masa konkrete për nxjerrjen nga arkiva të praktikave që i përkasin kësaj periudhe. Duke ju kërkuar që trajtimi i këtij kontingjenti aplikimesh të jetë fokusi i aktivitetit tuaj administrativ, ju sjellim në vëmendje se nga Drejtoria e Përgjithshme do të monitorohet në mënyrë të veçantë zbatimi i këtij prioriteti”, përfundon urdhri.
KADASTRA
Prej më shumë se dy muajsh është bërë edhe riorganizimi i institucioneve. Agjencia Shtetërore e Kadastrës është një strukturë e re, e cila ka bërë bashkë ALUIZNI- n me Hipotekën. Kjo reformë e ndërmarrë ka si qëllim përfundimin e praktikave të legalizimit dhe regjistrimin e çdo pasurie. Përgjatë viteve të shkuara, këto procese nuk ecën paralelisht, siç edhe duhej të ndodhte. Kjo bëri që të krijohej një stok me 80 mijë leje të paregjistruara. Këto praktika pritet të përmbyllen pas ndryshimeve të zyrtarizuara në 3- mujorin e dytë të këtij viti. Më herët, Lame ka bërë me dije se regjistrimi i tyre do të bëhet në një regjistër të posaçëm, për të mospenalizuar qytetarët nga e drejta e pronësisë. Nga ana tjetër, për procedurat e legalizimit ligji i ri parashikon një afat 60- ditor për pajisjen e qytetarëve me leje. Ndërkohë, për ata që duan të përshpejtojnë procesin, ligji i ri parashikon aplikimin e një tarife shtesë. “Poseduesi i ndërtimit pa leje ka të drejtë të kërkojë kryerjen e procedurave të legalizimit brenda 30 ditëve, kundrejt pagesës së një tarife shërbimi shtesë”, thuhet në nenin 16 të ligjit të ri “Për Kadastrën”.
LEJET
Më shumë se 30 mijë leje legalizimi u emetuan përgjatë vitit që lamë pas. Por këtë vit, gjasat janë që kjo shifër të reduktohet në 10 mijë. Kjo për shkak të kushtit të vendosur për taksën vendore. Konkretisht, me ndryshimet në ligjin “Për sistemin e taksave vendore” është parashikuar se leja e legalizimit miratohet vetëm pasi të jetë vërtetuar pagesa e taksës. “Ky amendim i ligjit, i cili shton hapat proceduralë të miratimit të lejes së legalizimit, pritet të ndikojë ndjeshëm në kohën e përmbylljes së procesit administrativ, duke kushtëzuar miratimin e lejes me veprimtarinë e vetëqeverisjes vendore, si edhe vullnetin e vetë subjekteve mbi shlyerjen në kohë të detyrimeve financiare, të cilat vijnë si pasojë e aplikimit të kësaj takse. Si rrjedhojë pritet që normativa mujore të ulet në 800 deri në 1 mijë leje në muaj, çka do të sjellë edhe uljen e numrit të pritshëm të lejeve të legalizimit për vitin 2019 me rreth 10 mijë”, vihet në dukje edhe në raportin e Agjencisë së Legalizimeve për vitin që lamë pas. Një tjetër problematikë është edhe moskualifikimi. Në Tiranë, pothuajse gjysma e ndërtimeve pa leje legalizohen dhe gjysma tjetër përjashtohet nga ky proces. Në raportin e një viti më parë vihet në dukje se nga rreth 100 mijë objekte informale në kryeqytet, vetëm 50 për qind prej tyre kualifikohen për t’u pajisur me certifikatë pronësie. Pjesa tjetër bie ndesh me kriteret e përcaktuara në ligjin e ri.