Dëbimi i refugjatëve me “pak dhunë”
Kroacia, si vend anëtar i BE- së, ka një qëllim të rëndësishëm: ajo do të bëhet pjesë e hapësirës Shengen. Por kush e paguan çmimin për udhëtimin e lirë nga Hamburgu deri në Dubrovnik? Gjatë 12 muajve të fundit, kjo është bërë vazhdimisht e qartë: Ka shumë raportime për qëndrimin brutal të policëve kroatë të kufirit ndaj refugjatëve, që janë përpjekur të kalojnë përtej pikëkalimeve kufitare zyrtare. Mbrojtësit kroatë të kufijve të jashtëm të BE- së duket se nuk stepen prej mizorisë. Mediat njoftojnë, se refugjatët, ndër ta edhe fëmijë, janë treguar para kamerave me plagë, të cilat u janë shkaktuar atyre nga Policia për t'i ndaluar të kalojnë në anën kroate.
Shumica e mediave kroate e kanë injoruar këtë tragjedi, që luhet vetëm 150 km larg kryeqytetit Zagreb. Ministria e Brendshme e Kroacisë i ka mohuar njoftimet për keqtrajtime të refugjatëve në kufirin me Bosnje- Hercegovinën gjatë të ashtuquajturave push- backs, pra, dëbimin e atyre që udhëtojnë ilegalisht. MOHIM NË ZAGREB, HESHTJE NË BRUKSEL
Amnesty International kritikoi është heshtjen e Brukselit ndaj këtyre rasteve. "Shtetet europiane mbyllin sytë kundrejt sulmeve dashakeqe të policëve kroatë dhe madje i financojnë aksionet e tyre", shkruan organizata humanitare në një deklarim të saj.
Qëkurse gazetarët e televizionit SRF nga Zvicra në maj i kanë filmuar dëbimet ilegale të refugjatëve në kufirin kroato- boshnjak, për autoritetet në Kroaci është bërë e vështirë që t'i minimizojnë apo t'i heshtin këto zhvillime.
Edhe Presidentja e Kroacisë, Kolinda Grabar- Kitaroviq, në fillim të korrikut tha para gazetarëve vendës në kufirin kroato- boshnjak, se "Nëse dikush kalon në këtë territor të vështirë, është normale që të përballesh me gërvishtje, hematoma dhe plagë. Duhet ta mendoni edhe këtë, nëse herën tjetër dëgjoni për historitë mbi brutalitetin e policëve tanë. Ata nuk janë brutalë, ju garantoj për këtë".
Asokohe u tha se nuk ka dëbime, pushbacks. Presidentja shtoi edhe se nuk kemi të bëjmë me refugjatë, por me migrantë ekonomikë.
Por vetëm pak ditë më pas, Grabar- Kitaroviq, në intervistë për televizionin SRF, në kuadër të vizitës në Zvicër, pranoi se policët kroatë zbatojnë push- backs.
"Jam interesuar te ministri i Brendshëm, shefi i Policisë në vend, dhe ata më siguruan që nuk ushtrojnë dhunë të ekzagjeruar. Natyrisht, pak dhunë duhet kur ata zbatojnë pushbacks", tha Kolinda Grabar- Kitaroviq para kamerave. Ajo konfirmoi pikërisht atë, që prej muajsh e mohonin politikanët kroatë.
Jelena Sesar nga Amnesty International e cilëson si "shokuese" deklaratën e Presidentes kroate dhe në bisedë për DW thekson, se: "Sipas së drejtës ndërkombëtare dëbimet kolektive dhe push- backs janë gjithmonë ilegale".
Është skandaloze se si Presidentja kroate përpiqet t'i paraqesë push- backs si masa legale dhe justifikon "pak dhunë" për zbatimin e tyre. Amnesty International kërkon që Komisioni Europian të ushtrojë presion ndaj Kroacisë, për t'u dhënë fund këtyre veprimeve në kufirin kroato- boshnjak. Komisioni i BEsë, i pyetur nga DW lidhur me deklaratat e Presidentes Kitaroviq, u përgjigj se nuk ka koment për këtë.