Basha me strategji të re pas takimit me Metën: “13 tetori”, mundësi për dalje nga kriza
“Opozita është e gatshme të ndërmarrë çdo hap për t’u garantuar shqiptarëve të drejtën e votës, që është dhunuar dhe tjetërsuar”
Opozita shqiptare është e gatshme të angazhohet në një proces zgjedhor, pasi të ketë marrë garanci për zgjedhje të lira dhe të ndershme përmes ndryshimeve kushtetuese.
Në kohën kur ka angazhuar për një riorganizim të brendshëm të gjithë Partinë Demokratike dhe forcat opozitare, kryedemokrati Lulzim Basha u takua me Presidentin e Republikës, Ilir Meta, për të diskutuar mbi dekretin e kreut të shtetit për zgjedhje vendore në 13 tetor. Lulzim Basha deklaroi se e mbështet plotësisht propozimin e Metës për zgjedhje të parakohshme, vendore dhe presidenciale në këtë datë, por kërkoi që më herët të ketë ndryshime kushtetuese që procesi zgjedhor i ardhshëm të mos ketë asgjë të ngjashme me 30 qershorin. “Kreu i shtetit mendon se 13 tetori është një mundësi për daljen nga kriza politike, përmes zgjedhjeve të parakohshme parlamentare, zgjedhjeve lokale dhe siç është shprehur politikisht, edhe përmes zgjedhjeve të reja presidenciale, që nënkupton ndryshime kushtetuese. Duke vlerësuar maksimalisht qëndrimin e Presidentit dhe shqetësimin e tij, i kam bërë të qartë se Partia Demokratike dhe opozita e bashkuar janë në këtë betejë për interesin e njerëzve, që zgjedhjet e ardhshme, ndryshe nga farsa e 30 qershorit, siç e deklaroi dhe OSBE/ ODIHR- i, duhet të jenë për njerëzit dhe jo për ymerlalët dhe shokun e tyre, ‘ Bablokun’ e madh dhe oligarkët. Në këtë funksion, opozita është e gatshme të ndërmarrë çdo hap për t’u garantuar shqiptarëve të drejtën e votës, që është dhunuar dhe tjetërsuar, përtej çdo përfytyrimi, çfarë u pa edhe me 30 qershor”, tha Basha.
TAKIMI Konsultimet e takimit me kreun e shtetit lidhur me zgjedhjet e parashikuara në 13 tetor, Lulzim Basha i ndau me aleatët e tij opozitarë. Në një takim në selinë blu, Basha foli për një aksion tërësor politik për t’u ofruar shqiptarëve zgjedhjet që presin. “Kemi diskutuar për emergjencën ekonomike ku ndodhet vendi, sepse një nga mëkatet më të mëdha, një nga fajet më të mëdha të kësaj bande që na qeveris është që, duke tërhequr opozitën në betejën parimore për vlerat themelore të lirisë e të demokracisë, të luftës kundër krimit dhe drogës, ia ka dalë t’i vërsulet Shqipërisë, buxhetit të saj, pasurive të saj, ta vjedhë dhe ta grabisë qytetarin e thjeshtë, pasurinë e këtij vendi dhe ta zhysë ekonominë në ditën e saj më të zezë, në të paktën 2 dekada”, theksoi kreu i PD- së pas takimit.