Meta i kthen maxhorancës dy ligje: Janë të nxituara
“Për vetëqeverisjen vendore", cenohet vendimmarrja e këshillave
Presidenti i Republikës, Ilir Meta, i ktheu dje Parlamentit dy ligje të tjera, pasi një ditë më parë kishte kthyer ligjin "Për rezervat materiale të shtetit", si të pajustifikuar.
Në rastin e parë bëhet fjalë për ligjin "Për disa shtesa në aktin normativ, me fuqinë e ligjit, nr. 4, datë 9.7.2008, të Këshillit të Ministrave", "Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve", i miratuar më 20 qershor. Në argumentimin e Presidentit thuhet se "ky ligj, i paraqitur për shpallje, është një nismë ligjore e nxituar, jo e plotë dhe fryma e këtij ligji shkon në kundërshtim me kuadrin ligjor aktual në fuqi. "Në relacionin shpjegues të kthimit të ligjit, kreu i shtetit thekson se është një nismë ligjore jo e plotë. "Në përfundim të shqyrtimit të ligjit nr. 37/ 2019 "Për disa shtesa në aktin normativ, me fuqinë e ligjit, nr. 4, datë 9.7.2008, të Këshillit të Ministrave, Presidenti i Republikës çmon se ky ligj, i paraqitur për shpallje, është një nismë ligjore e nxituar, jo e plotë dhe fryma e këtij ligji shkon në kundërshtim me kuadrin ligjor aktual në fuqi", thuhet në argumentet e Presidentit të Republikës. Nisur nga studimi që juristët e Presidentit i kanë bërë ligjit të ri, rezulton se "nëse krahasojmë drejtpërdrejt qëllimin për të cilin është nxjerrë akti normativ nr. 4, datë 09.07.2008, dhe përmbajtjen e ligjit nr. 37/ 2019, del qartë se kemi të bëjmë me dy akte që synojnë të rregullojnë çështje dhe problematika të ndryshme, ndërkohë që krahasimisht të dy këto akte nuk përmbajnë procedura të së njëjtës frymë që të garantojnë në nivel të njëjtë lirinë e veprimtarisë ekonomike".
PUSHTETI VENDOR Presidenti Ilir Meta ktheu dje për rishqyrtim edhe ligjin "Për vetëqeverisjen vendore" për të rishikuar dy nene të tij. Në relacionin e Presidentit thuhet se ndryshimet ligjore cenojnë procesin vendimmarrës të Këshillave Bashkiakë në lidhje me tjetërsimin e pronave të tyre. "Këto ndryshime janë të pajustifikuara, pasi mënyra e re që propozohet për kuorumin e nevojshëm në vendimmarrjet e Këshillave Bashkiakë nuk garanton mbrojtjen e interesit publik në procedurat e tjetërsimit të aseteve publike në pronësi të pushtetit vendor", thuhet midis të tjerash. "Siç rezulton qartësisht nga kjo ndërhyrje që propozohet të realizohet, në ligjin nr. 139/ 2015, ky ndryshim në ligj në thelb krijon një kompetencë të re për Këshillat Bashkiakë, që është e drejta e këtyre të fundit për të hyrë në marrëdhënie juridike me persona të tretë për zhvillimin e pronës publike. Kjo kompetencë nuk ka qenë parashikuar më parë në ligj", thuhet në relacion. Sipas Presidentit të Republikës, "bazuar mbi këtë arsyetim, të shpjeguar si më poshtë vijon, në bindje të Kushtetutës dhe në ushtrim të së drejtës të parashikuar në pikën 1 të nenit 85 të saj, Presidenti i Republikës vlerëson se ligj nr. 38/ 2019 "Për disa shtesa dhe ndryshime në ligjin nr. 139/ 2015 ' Për vetëqeverisjen vendore'", i duhet kthyer Kuvendit, me qëllim rishikimin e neneve 3 dhe 4 të këtij ligji". Ligji aktual përcaktonte se të gjitha vendimet ku do të trajtohen vendimmarrje të tjetërsimit ose dhënies në përdorim të pronave në favor të të tretëve që trajtohen në Këshillin Bashkiak miratohen me shumicë të cilësuar, 3/ 5 të votave. Por në ndryshimet që i janë bërë këtij ligji, "rezulton se gjatë punës në Komisionin e Çështjeve Ligjore, Administratën Publike dhe të Drejtat e Njeriut, është bërë një propozim, i cili e prish këtë regjim të vendosur nga ligji ekzistues. Komisioni ka marrë në shqyrtim dhe ka pranuar propozimin e paraqitur nga relatori për ndërhyrje në dispozitat e mësipërme, që trajtojnë kompetencat e Këshillit Bashkiak dhe vendimmarrjen e tij, në kuadër të ushtrimit të të drejtës së pronësisë së bashkive". Por kreu i shtetit konstaton se Kuvendi i Shqipërisë, me ndryshimet që ka vendosur të realizojë nëpërmjet nenit 3 dhe 4 të ligjit nr. 38/ 2019, po krijon një kompetencë të re për autoritetet vendore, por nuk ka parashikuar asnjë dispozitë mbi mënyrën ligjore se si këto autoritete ( Këshillat Bashkiakë) do të formojnë vullnetin e tyre për të përzgjedhur subjektin me të cilin do të hyjnë në marrëdhënie për të zhvilluar pasuritë e paluajtshme në pronësi të tyre.