Pompat e naftës, Shehaj: Qeveria shkeli ligjin, Gjykata e anuloi
Ish- deputeti i PD- së, Agron Shehaj, akuzoi qeverinë dhe Kryeministrin Rama se kanë dhënë me koncesion kontrollin e pompave që furnizojnë qytetarët me karburant. Shehaj publikoi një vendim të Gjykatës Administrative të Tiranës, që pezullon tenderin e dhënë nga qeveria. Shehaj tha se koncesioni i heq arkës së shtetit 100 milionë euro për 20 vjet, ndërsa shtoi se Rama ua jep këto para klientëve dhe familjes së tij. "Është shkelur haptas ligji për koncesione, sepse vendimi për të privatizuar këtë shërbim nëpërmjet koncesionit nuk është marrë në bazë të një analize kosto/ përfitime për shtetin shqiptar. Ky shërbim sjell shumë përfitime në arkat e shtetit, ka një kosto shumë të ulët ekzekutimi dhe Drejtoria e Përgjithshme e Metrologjisë do të vazhdojë të operojë edhe pas dhënies së koncesionit. Kompania ' Noa Control' është krijuar enkas për të propozuar dhe fituar këtë koncesion. Të gjitha vendimet e marra nga qeveria janë në favor të kompanisë propozuese të tenderit. Qeveria shpërfill vendimin e Gjykatës, dhunon shtetin e së drejtës dhe kryen një vepër penale për të favorizuar një kompani në tender. Investimi është prej vetëm 600.000 eurosh, kurse përfitimet janë shumë herë më të mëdha, 100 milionë euro. Kohëzgjatja prej 20 vjetësh është e pajustifikueshme, ka si qëllim vetëm krijimin e një monopoli", tha ish- deputeti. Por Ministria e Financave, përmes një deklarate, sqaroi se janë vendosur kushte në kontratë se s'do të ketë rritje të çmimit. "MFE ka vendosur kushte në draftkontratën e hartuar sipas procedurës, ku garanton mosndryshimin e tarifës së shërbimit, e cila përcaktohet dhe do të zbatohet sipas Udhëzimit nr. 2, datë 8.2.2013, ' Tarifat dhe Pagesat e Shërbimeve" dhe do të mbetet e njëjtë gjatë gjithë kohëzgjatjes së kontratës. Kjo do të thotë që koncesionari do të aplikojë të njëjtën tarifë, që është e aplikueshme aktualisht në përputhje me legjislacionin për metrologjinë dhe që edhe në të ardhmen nuk do të ketë asnjë kosto shtesë gjatë gjithë periudhës së koncesionit. Pra, nuk do të ketë rritje çmimi", thuhej në reagimin e Ministrisë.