Haradinaj: E falënderoj Macron për sinqeritetin që na përcaktoi shtet
Kryeministri i Kosovës, Ramush Haradinaj, ka reaguar në lidhje me deklaratat e Presidentit francez Emmanuel Macron gjatë vizitës në Beograd, për të arritur kompromis me Kosovën. Kërkesën e Macron, Haradinaj e cilëson si një këshillë. “Vlerësimi për kompromis është në logjikën e një këshille që jepet në këto raste. Dhe mendoj që nuk bën përjashtim. E falënderojmë Presidentin Macron për sinqeritetin e shprehur, kur tha se Kosova dhe Serbia janë dy shtete europiane, me perspektivë europiane, mendoj se kjo shpjegon shumë”. I pyetur për kërkesën e Macron gjatë fjalimit të tij në Beograd, se Kosova dhe Serbia duhet të arrijnë kompromis, Haradinaj tha se “Është në logjikën e këshillave, nuk është një përshkrim i asaj se çfarë mund të jetë kompromisi, por është një këshillë e zakonshme që të gjejmë një kompromis. Mund të jetë kompromis i njëanshëm, i dyanshëm, ose i asnjërës palë sepse s’ka nevojë. Kjo gjuhë është diçka e logjikshme”. Porosia kryesore e Macron gjatë vizitës historike të një presidenti francez në serbi, e para pas 18 vitesh, ishte e fokusuar në arritjen e një marrëveshjeje gjithëpërfshirëse mes Kosovës dhe Serbisë dhe vazhdimin e dialogut. Macron vendosi të kryejë vizitën në Serbi pas dështimit të një samiti të planifikuar në Paris prej tij dhe Kancelares gjermane, Angela Merkel, ku do të bëheshin përpjekje për të ulur sërish palët në bisedime, pas “ngrirjes” së dialogut me vendosjen e një takse 100 për qind të qeverisë së Kosovës ndaj produkteve serbe, si kundërpërgjigje ndaj “luftës” të vazhdueshme të Serbisë kundër njohjes së pavarësisë së Kosovës.