Gurbanov: Partizani serioz, i besoj eksperiencës
I pari që ka dalë dje para mediave ka qenë trajneri i Karabakut, Gurban Gurbanov, konferenca e të cilit u zhvillua në "Azersun Arena". Ndërsa trajneri i Partizanit, Franko Lerda, konferencën e ka zhvilluar në "Dalga Arena". Trajneri Gurbanov ka folur për cilësitë dhe dëshirën e Partizanit në këtë përballje me Karabakun, por falë eksperiencës së skuadrës së tij, beson te kualifikimi. Gurbanov nuk e përjashtoi mundësinë e gjuajtjeve të penalltive në fund, ndaj të dyja ekipet duhet të jenë të përgatitura. "Rivali ynë është serioz, i disiplinuar. Ata mbrojnë me korrektësi dhe agresivitet dhe kjo na krijoi probleme në ndeshjen e parë. Partizani bën edhe kundërsulme të cilësisë së lartë, ndaj është një kundërshtar i vështirë për ne. Por kemi luajtur edhe më parë ndaj skuadrave të tilla. Prej deklaratave të tyre është e qartë se ata kanë shumë dëshirë të fitojnë dhe ta kalojnë turin. Do të jetë një ndeshje e vështirë, por do të mundohemi të tregohemi të kujdesshëm dhe të luajmë në mënyrë të disiplinuar. Të paktën të mundohemi të kënaqim fansat me një ndeshje të mirë", tha Gurbanov para mediave.
Eksperienca- "Po, kemi eksperiencë dhe nga një anë ky është avantazh. Megjithatë, unë shqetësohem pasi kur ke sukses, vjen një moment që mbërrin edhe dështimi. Eksperienca jonë duhet të na ndihmojë, sidomos para tifozëve tanë. Eksperienca dhe durimi duhet të na ndihmojnë që të arrijmë sukses", vijoi trajneri i Karabakut.
Penalltitë- "Në sfida vajtje- ardhje, gjëra të tilla ndodhin. Të dyja skuadrat duhet të jenë të përgatitura për këtë. Por, unë nuk i përgatis lojtarët, përkundrazi, e kuptoj rëndësinë e kësaj ndeshjeje, penalltitë janë të tilla që nuk duhet t'i mendosh më përpara", përfundoi Gurban Gurbanov.