PER TRI KATEGORI
Shtesa e pensionit, lista e profesioneve që përfitojnë
ISSH sqaron rritjen e re të pensioneve. Kush janë tri kategoritë që përfitojnë dhe shtesa sipas profesioneve të vështira. Kushtet me skemën e miratuar
Profesionet e konsideruara si të vështira dhe shumë të vështira janë ato, të cilat do të përfitojnë nga shtesa e pensioneve.
Në fillim të këtij muaji hyri në fuqi edhe ligji i ri i qeverisë për trajtimin me pensione suplementare të minatorëve, naftëtarëve dhe metalurgëve. Gazeta zbardh sot listën e profesioneve nga këto tri kategori, për të cilat do të aplikohet shtesa që varion nga 9 deri në 20 për qind. "Në nenin 2 dhe 3 të ligjit të ri është përcaktuar se përfitues janë pensionistët dhe invalidët që marrin pension si edhe punonjësit që ende nuk kanë dalë në pension, por kanë punuar në punë të kategorizuara shumë të vështira dhe të vështira, të nëntokës, industrisë së naftës dhe metalurgjisë. Ndarja e punëve në kategori për efekt pensioni është e përcaktuar në Vendimin 526, 20.12.2058, i ndryshuar. Në procesin e zbatimit, sigurimet shoqërore i referohen llojit të punës të evidentuar në librezën e punës, i dokumentuar saktësisht si dhe verifikimit të tyre bazuar në dokumentacionin arkivor", bëhet me dije nga Instituti i Sigurimeve Shoqërore. Në tabelën përbri janë të listuara edhe profesionet, që do të jenë pjesë e skemës suplementare, për secilën prej kategorive konkretisht minatorëve, naftëtarëve dhe metalurgëve. Por duke qenë se ka pasur ndryshime, ISSH është duke hartuar tabelat e reja, në të cilat do të pasqyrohen edhe profesionet reja, të përditësuara.
PROFESIONET Sa u takon minatorëve, do të përfitojnë nga shtesa të gjithë ata që kanë punuar si vagonistë, zjarrmëtarë në nëntokë, makinistë të sharrave prerëse në nëntokë; pompist i brendshëm në nëntokë etj. Në industrinë e naftës dhe gazit përfshihen punë të vështira dhe shumë të vështira sipas përcaktimeve në VKM 526/ 1948 i ndryshuar, si p. sh. saldator dhe elektrosaldator në rezervuar, kulla dhe cisternë, punëtor i pastrimit të brendshëm të rezervuarëve, depove dhe cisternave të naftës. Gjithashtu, si punë të vështira në industrinë e naftës konsiderohen edhe puna e personelit inxhiniero- teknik të naftës, kur kanë punuar e drejtuar drejtpërdrejt sektorë të shpimkërkimit dhe shpim- shfrytëzimit, sektori i nxjerrjes së naftës dhe të gazit, sektori i punimeve gjeologo- gjeofizike në naftë edhe gaz, të cilat, bazuar në nenin 3 të ligjit, do të përcaktohen saktësisht me vendim të Këshillit të Ministrave. Nga ana tjetër, në metalurgji si punë të vështira klasifikohen punëtorët e shkrirjes dhe derdhjes së metalit, punët shumë të vështira në metalurgjinë e zezë e ferrokrom, si p. sh. në uzinën e petëzimit, në uzinën e gizës, në repartin e pjekjes, në uzinën e çelikut etj.
SKEMA Janë më shumë se 23 mijë pensionistë që do të përfitojnë nga shtesa, e cila varion nga deri në 20 për qind mbi masën e pensionit. Ligji, i cili ka hyrë në fuqi në datën 5 korrik të këtij viti, parashikon rritje me 1 për qind për çdo vit pune në nëntokë për minatorët. Ndërsa për metalurgët dhe naftëtarët, shtesa është me 0.6 për qind për çdo vit kontributiv. Kjo do të thotë se sa më shumë vite pune, aq më i lartë edhe përfitimi. Në argumentimin që i është bërë ligjit thuhet se për një minator që merr mesatarisht 23 mijë lekë pension, do të marrë një shtesë, e cila shkon deri në 4300 lekë në muaj. E njëjta gjë vlen edhe për metalurgët dhe naftëtarët, për të cilët rritja varion nga 9 për qind deri në 12 për qind. Shtesa, sipas ISSH- së, do të nisë të aplikohet në muajin shtator, por efektet do t'i ketë duke nisur nga muaji korrik. Pra, pensionistët do të kenë mundësi të marrin shtesën edhe të muajit korrik dhe gusht, krahas shtatorit.