Reeker: Kriza të zgjidhet brenda kuadrit kushtetues

“Bojkoti nuk është ai që shpresuam, përdorni institucionet”

Ambasadorja e Shqipërisë në SHBA, Floreta Faber, publikoi dje në “Twitter një qëndrim” të ndihmëssekretarit të Shtetit për Euroazinë, Philip Reeker. Sipas ambasadores, Reeker është shprehur se Shqipëria duhet të përdorë institucionet e saj në mënyrë që të kalojë gjendjen e sotme politike. Bojkoti i opozitës, sipas ndihmëssekretarit të Shtetit për Euroazinë, nuk ishte ajo që shpresonte SHBA. “Shqipëria duhet të përdorë institucionet e saj në mënyrë që të kalojë situatën politike, në të cilën ndodhet. Bojkoti nuk është ai që shpresuam të ndodhte. Ata duhet ta zgjidhin këtë situatë brenda kornizës kushtetuese”, ka deklaruar diplomati Reeker. Dy ditë më parë, ministri i Jashtëm në detyrë, Gent Cakaj, zhvilloi një takim me ndihmëssekretarin amerikan të Shtetit në detyrë për Çështjet Europiane dhe të Azisë, Philip Reeker. Në këtë takim, sipas një postimi të bërë nga Cakaj, u nënvizua rëndësia e konsolidimit të mëtejmë të bashkëpunimit rajonal dhe nevoja absolute e mbylljes së çështjeve dypalëshe në të gjithë hapësirën e Ballkanit Perëndimor, teksa angazhimi i SHBA- ve do të jetë maksimal në shërbim të realizimit të këtij objektivi. “Shtetet e Bashkuara të Amerikës konsiderojnë se Reforma në Drejtësi s’mund të jetë subjekt i asnjë kompromisi dhe ajo përbën një model për rajonin dhe përtej. Bazuar mbi modelin e pakrahasueshëm të Reformës në Drejtësi dhe rëndësinë gjeostrategjike të thellimit të lidhjeve midis Shqipërisë dhe BE- së, SHBA- të mbështesin në mënyrë absolute hapjen e negociatave për anëtarësim në tetor”, ka shkruar Cakaj në postimin e tij.