Pas rrëzimit të Tushës e Shaqirit, Meta propozon Milon për kreun e KLSH
“Nuk gjeta një kandidat më të përshtatshëm dhe me kaq eksperiencë të gjithanshme se prof. dr. Petraq Milo për këtë detyrë”
Presidenti i Republikës, Ilir Meta, i ka propozuar Kuvendit Petraq Milon si kandidaturën e tij të re për drejtimin e Kontrollit të Lartë të Shtetit.
Pas rrëzimit të dy kandidaturave të mëparshme, Meta i ka propozuar Kuvendit profesor Milon, duke e vlerësuar këtë të fundit për eksperiencën e jashtëzakonshme, brenda dhe jashtë vendit në fushën e financave. Zëdhënësi i Presidentit, Tedi Blushi, theksoi se kreu i shtetit, pasi lexoi kriteret e vendosura nga Kuvendi, nuk gjeti një kandidat më të përshtatshëm dhe me kaq eksperiencë sa profesor Petraq Milo. “Presidenti i Republikës, Sh. T. Z Ilir Meta, ka vendosur t’i propozojë Kuvendit të Republikës së Shqipërisë, si kandidat për postin e kryetarit të Kontrollit të Lartë të Shtetit, prof. dr. Petraq Milo. Prof. dr. Petraq Milo është një personalitet me një eksperiencë të jashtëzakonshme, brenda dhe jashtë vendit në fushën e financave, të auditit, të bankave dhe të ekonomisë në tërësi, gjithashtu me një kontribut të spikatur në drejtimin e institucioneve financiare, fiskale e bankare në Kosovë. Presidenti Meta, duke qenë i bindur në drejtësinë e vendimit të Tij, pasi ka lexuar me shumë vëmendje sugjerimet e Kuvendit të Republikës së Shqipërisë lidhur me profilin profesional që duhet të ketë kandidati për kryetar i KLSH- së, nuk gjeti dot një kandidat më të përshtatshëm dhe me kaq eksperiencë të gjithanshme, si prof. dr. Petraq Milo, për të përmbushur me profesionalizëm dhe dinjitet këtë detyrë tepër të rëndësishme kushtetuese”, u shpreh zëdhënësi i Presidentit. Duke qenë i bindur në eksperiencat e profesionale dhe akademike të profesorit Petraq Milo, Meta ka kërkuar nga Kuvendi të shqyrtojë me objektivitet dhe përgjegjshmëri emrin e tij për drejtimin e Kontrollit të Lartë të Shtetit. “Përvoja e tij akademike, brenda dhe jashtë vendit, si edhe bashkëpunimi me institucionet më të rëndësishme financiare botërore dhe të Bashkimit Europian, janë një faktor i rëndësishëm për këtë zgjedhje. Presidenti Meta do t’ia dërgojë brenda ditës së sotme propozimin e tij Kuvendit, me besimin e plotë se do ta shqyrtojë këtë kandidaturë brenda këtij sesioni parlamentar, me objektivitet dhe përgjegjshmëri, që KLSH të funksionojë në mënyrë plotësisht kushtetuese e ligjore”, thuhet në njoftimin e Presidencës.
PROPOZIMET
Në harkun kohor të 10 muajve, Presidenti Meta i ka propozuar Kuvendit të Shqipërisë tre kandidatura për drejtimin e Kontrollit të Lartë të Shtetit, pas përfundimit të mandatit të Bujar Leskaj. Në nëntor të vitit 2018, kreu i shtetit propozoi Vitore Tushën, anëtaren e Gjykatës Kushtetuese, si propozim të tijin për drejtimin e KLSH, por Kuvendi rrëzoi me 71 vota këtë kandidaturë. Në janar të 2019, Meta i propozoi Kuvendit emrin e ish- kreut të SHISH, Bahri Shaqirit. Por edhe kjo kandidaturë nuk u pranua nga maxhoranca, e cila e rrëzoi me 77 vota. Të mërkurën, në zyrën e Kuvendit ka mbërritur propozimi i tretë i kreut të shtetit për drejtimin e KLSH, ai i profesorit Petraq Milo. Asnjë zë brenda maxhorancës nuk reagoi për këtë propozim të Metës, ndryshe nga ajo që ka ndodhur me propozimet e tjera, të cilat janë rrëzuar publikisht përpara se të merreshin në shqyrtim në Kuvend. PROFILI
Petraq Milo, kandidatura e re e Presidentit Meta, për drejtimin e KLSH është një personalitet me një eksperiencë të jashtëzakonshme, brenda dhe jashtë vendit në fushën e financave, të auditit, të bankave dhe të ekonomisë në tërësi, gjithashtu me një kontribut të spikatur në drejtimin e institucioneve financiare, fiskale e bankare në Kosovë. Milo është profesor në Shkencat Ekonomike në Universitetin e Tiranës nga viti 2013. Doktor në Shkencat Ekonomike në Politikat e Financave Publike dhe Politika Monetare, Ministria e Arsimit dhe Shkencës të Francës, Universiteti i Auvergnes, Francë, 1999. Ajo që e bën akoma më interesant propozimin e ri të kreut të shtetit, është fakti se Petraq Milo ka qenë këshilltar i ish- Kryeministrit Berisha. Milo ka qenë këshilltar i Kryeministrit të Shqipërisë, Këshilli i Ministrave, Shqipëri, nga tetori i vitit 2005 deri në gusht të vitit 2013. Milo ka qenë anëtar i Bordit Mbikëqyrës së Bankës së Shqipërisë, nga 2011- 2018, Kryetar i Komitetit të Auditimit të Bankës Qendrore të Shqipërisë, Drejtues i Autoritetit Qendror Fiskal, UNMIK – EU, Kosove, nga janari 2004 deri në janar 2005, Kryetar i Komitetit të Auditimit të Bankës Qendrore te Kosovës.
Ajo që e bën akoma më interesant propozimin e ri të kreut të shtetit, është fakti se Petraq Milo ka qenë këshilltar i ish- Kryeministrit Berisha. Milo ka qenë këshilltar i Kryeministrit të Shqipërisë, Këshilli i Ministrave, nga tetori i vitit 2005 deri në gusht të vitit 2013.