Malaj: Reagimin duhet ta bëjë vetëm Këshilli Mbikëqyrës
Anëtari i Këshillit Mbikëqyrës të Bankës së Shqipërisë, Arben Malaj për të cilin Grupi Parlamentar i PS- së ka nisur procedurën e shkarkimit, reagoi dje duke thënë se ka respektuar në maksimum Kodin e Etikës. Përmes një postimi në “Facebook”, Malaj reagoi dhe ndaj sqarimit që bëri Banka e Shqipërisë lidhur me kërkesën e deputetëve të PS për shkarkim dhe shkelje të etikës në detyrë. “Për këtë debat nuk shprehet Banka e Shqipërisë si institucion, por vetëm Këshilli Mbikëqyrës. Kam respektuar në maksimum Kodin e Etikës, nuk marr pjesë në asnjë strukturë të asnjë partie, këtë kërkon ligji i Bankës, nuk jam i angazhuar në asnjë aktivitet politik, sapo mbaruan zgjedhjet vendore, kjo konstatohet lehtë. Po ngatërrohet me keqdashje dallimi midis angazhimit apo aktiviteteve publike me angazhimet dhe aktivitetet politike. Kam plotësuar me integritet dhe profesionalizëm mandatin e dhënë nga Kuvendi i vendit tim në rastin e parë me 100 % të votave dhe në rastin e dytë me vetëm dy vota kundër”, shkruan Malaj. Sipas tij, reagimi i Bankës për aktivitetin e anëtarit të Këshillit Mbikëqyrës është cenim i kredibilitetit dhe pavarësisë së saj. “Reagimi në emër të Bankës Shqipërisë sot pas kërkesës së deputetëve dhe jashtë hapave ligjorë dhe institucionalë, që në këtë rast është vetëm Këshilli Mbikëqyrës, përbën cenim të kredibilitetit dhe pavarësisë së Bankës së Shqipërisë. Kredibiliteti publik dhe pavarësia reale e Bankës së Shqipërisë duhet të jenë të shenjta dhe duhen ruajtur me përgjegjshmëri maksimale nga çdo pozicionim publik jashtë kornizave institucionale”, shkruan Malaj. Ai sqaron se ka qenë nismëtar i zbatimit të rezolutave të Kuvendit në Këshillin Mbikëqyrës, ndryshe nga ç’pretendohet nga deputetët firmëtarë se Këshilli ka anashkaluar dhe injoruar zbatimin e rezolutave të Kuvendit. “Kam qenë unë që pas mandatit të ri kam kërkuar që rezoluta e Kuvendit për vitin 2018 që ka detyra për vitin 2019, të diskutohej në Këshill dhe me detyrat e dhëna nga Kuvendi të njihej Këshilli dhe stafi drejtues i Bankës dhe për detyrat konkrete, Këshilli të ndërtonte një plan veprimi përmbushës të detyrave të lëna nga Kuvendi. Qëndrimet si gjatë mandatit plotësues dhe aktualisht, janë të dokumentuara në proces verbalet e Këshillit Mbikëqyrës. Ky sqarim është në respekt të institucionit të Bankës së Shqipërisë”, përfundon reagimin e tij anëtari i Këshillit Mbikëqyrës, Arben Malaj.