Nga hetimi i bandave te korrupsioni, si u prezantuan prokurorët e SPAK- ut
KLP zbardh intervistimet e 22 kandidatëve për Prokurorinë Speciale, treguan eksperiencat dhe vështirësitë në punë
Këshilli i Lartë i Prokurorisë publikoi dje në faqen zyrtare prezantimet që bënë pak ditë më parë 22 kandidatët për Prokurorinë e Posaçme kundër Korrupsionit dhe Krimit të Organizuar.
Prezantimet nisën sipas rendit alfabetik me Altin Dumanin, drejtues i përkohshëm i Prokurorisë së Apelit për Krime të Rënda, që nga muaji shkurt i këtij viti, i cili u kualifikua, e me radhë deri te i fundit, Vladimir Mara, prokuror i Krimeve të Rënda, që u skualifikua. Seancat e prezantimeve, ndonëse hapeshin me sportivitet nga kreu i KLP- së, Genti Ibrahimi, nuk kaluan pa emocione nga ana e kandidatëve. Për disa, ndonëse tentohej të krijohej një ambient pa tension, si bashkëbisedim mes kolegësh, ishte e pamundur që t’i shmangnin emocionet. Ashtu siç ishte i pari në listë Altin Dumani, që ndonëse me një eksperiencë të gjatë nuk arriti të shtensionohej plotësisht, as kur përmendi vështirësitë e punës së tij. Por kishte edhe të tjerë, siç ishte Anton Martini, që renditi një e nga një punët e tij si përfaqësues i akuzës në gjyq për shumë dosje bandash kriminale, pa u stepur në asnjë moment. Në përfundim të seancave të intervistimit u kualifikuan 15 prej kandidatëve të SPAK, disa prej të cilëve ende nuk e kanë kaluar vetingun.
PREZANTIMET “Në janar të vitit 2000 jam emëruar drejtues i Prokurorisë së Rrethit Gjyqësor Tropojës në një kohë shumë të vështirë kur shumë prokurorë kishin refuzuar ta merrnin atë detyrë, për mungesë të sigurisë në atë kohë. Pasiguria ishte shumë e madhe dhe ngjarjet kriminale ishin të shumta. Madje, edhe vetë zyrat e Prokurorisë, që unë drejtoja në atë kohë, u bënë objekt i një sulmi kriminal, në nëntor të vitit 2000. E gjithë fasada e Prokurorisë u sulmua me armë dhe u tentua të digjej godina. Kjo ndodhi për shkak të funksioneve, pasi vetëm pak ditë para këtij sulmi, ne kishim arritur që të arrestonim disa eksponentë të krimit në Tropojë”, u shpreh Altin Dumani gjatë prezantimit të tij. Ndërsa Anton Martini, prokuror i Shkodrës, i komanduar që nga muaji qershor i vitit 2018 në Prokurorinë për Krime të Rëndë, nuk ngurroi të shfaqte rezervat e tij për transferimin në Shkodër në vitin 2015. “Nga fundi i vitit 2015 transferohem në Prokurorinë e Shkodrës, transferim i cili në fakt nuk erdhi si zbatim rigoroz të ligjit si funksiononte Prokuroria”, tha Martini. Më tej, përmendi disa nga sukseset e tij si prokuror, që nga “Banda e Lushnjës”, “Banda e Durrësit”, “Banda e Cërrikut”. Por theksoi edhe faktin se është pionieri i parë i vënies në zbatim të metodave speciale, siç është edhe bashkëpunëtori i drejtësisë apo edhe metoda të tjera speciale të hetimit. Ndërsa Elisabeta Imeraj, prokurore e Krimeve të Rënda, e komanduar si drejtuese e Prokurorisë së Tiranës, e nisi prezantimin e saj me një shprehje të Aristotelit, si një parantezë të asaj që përfaqëson vetë Prokuroria Speciale që tashmë është drejt ngritjes. “Fillimisht, duhet të gjesh objektivin, më pas të përcaktosh mjetet dhe në fund të përshtatësh mjetet”, citoi Imeraj. Më tej, ajo shpjegoi arsyet se përse vendosi të kandidojë për të qenë pjesë e SPAK- ut. Nga ana tjetër, Klodian Braho, një nga prokurorët e Krimeve të Rënda që po heton ish- prokurorin e Përgjithshëm Adriatik Llalla, nuk u zgjat aq sa të tjerët gjatë prezantimit të tij. Braho përmblodhi disa nga çështjet që ka hetuar, kryesisht për korrupsionin e të zgjedhurve vendorë, duke filluar me Prokurorinë e Vlorës, ku edhe ka ushtruar profesionin e tij. “E shoh veten të familjarizuar me hetimin e këtyre lloj veprash penale. Automatikisht që në momentin kur këto vepra penale shkojnë si kompetencë të një prokurorie tjetër, e mendova të arsyeshme që të kandidoj”, u shpreh Klodian Braho.