Mungesa e dokumenteve shtyn gjykimin për Tahirin
Tahiri kërkoi që gjyqi të mos shtyhej: Situatë skandaloze
Mungesa e dëshmive të përkthyera të anëtarëve të grupit "Habilaj" në dosjen ndaj Saimir Tahirit, bëri që Gjykata për Krime të Rënda të shtynte për të tretën herë gjyqin.
Ish- ministri kërkoi me tone të ngritura në Gjykatë, që procesi të mos shtyhej për këtë shkak, ndërsa jashtë sallës nuk nguroi ta konsideronte situatën qesharake. Ndërkohë, në seancën e djeshme, Gjykata bëri ndarjen e çështjes, duke pezulluar gjykimin për dy ish- funksionarët e Policisë së Shtetit, Sokol Boden dhe Gjergji Kohilën, për shkak të mungesës, dhe të vazhdojë gjykimin për Saimir Tahirin dhe ish- drejtorin e Policisë së Vlorës, Jaeld Çelën. Në momentin që Gjykata do të tërhiqej për të shqyrtuar kërkesën për gjykim të shkurtuar të ish- ministrit Saimir Tahiri dhe Jaeld Çelës, u vuri në dukje prokurorëve të çështjes se në dosjen që ata disponojnë mungon procesverbali i përkthimit të dëshmive të Moisi Habilajt, Nezar Seitit dhe Meridian Sulajt. Të tri këto dëshmi janë dorëzuar në gjuhën italiane, por mungon një kopje e përkthimit të tyre. Prokurori Vladimir Mara, pas tërheqjes për disa minuta për të bërë verifikimin, tha se këto dokumente ende nuk janë përkthyer dhe se ata kërkonin kohë. "Aktualisht, këto dokumente nuk janë përkthyer akoma, kërkojmë kohë", tha Mara.
REAGIMI
Kërkesa e prokurorit nuk kaloi pa u kundërshtuar nga avokati i Tahirit, Maksim Haxhia, i cili kundërshtoi duke thënë që dëshmitë janë të përkthyera dhe këtë e vërtetonte korrespondenca me Ministrinë e Brendshme. "Këto dëshmi janë të përkthyera, pasi në dosje është korrespondenca me Ministrinë e Drejtësisë për dhënien rrugë të këtyre letërporosive, ose kjo situatë është nga amullia e dosjeve që kanë këta prokurorë, ose është taktikë për shtyrjen e çështjes", tha Maksim Haxhia. Për kërkesën për shtyrje të bërë nga Mara, foli edhe Saimir Tahiri, i cili tha se nëse duhet kohë kjo të jetë brenda ditës, por jo në një datë tjetër. "Nëse duhet kohë, unë këtu jam në dispozicionin tuaj, deri në çfarëdo ore, por vetëm kjo seancë të mos shtyhet. Këto dëshmi janë në favorin tim, janë prova në favorin tim, por unë jam i gatshëm të heq dorë nga këto prova, nuk i dua. Le të vazhdojmë gjykimin edhe pa to. Edhe një çerdhe është më e organizuar se kaq", përfundoi fjalën ish- ministri Saimir Tahiri. Pavarësisht kësaj kërkese të Tahirit, treshja gjykuese e pa të arsyeshme të shtyjë seancën në datën 22 korrik, në mënyrë që këto dokumente të vihen në dispozicion.
PROKURORIA
Gjatë seancës së djeshme, Prokuroria për Krime të Rënda bëri edhe kërkesën e saj për gjykimin e të pandehurve, Saimir Tahiri dhe Jaeld Çela, për tri vepra penale, atë të "Trafikimit të narkotikëve", në bashkëpunim, në formën e grupit të strukturuar kriminal, "Kryerjes së veprave penale nga organizata kriminale" dhe "Grup i strukturuar kriminal".