Sekuestro pasurive të të arrestuarve për eurot në “Toyota Yaris”
Policia njoftoi dje se ka bërë sekuestrimin e pasurive të të hetuarve për eurot e sekuestruara në një makinë "Toyota Yaris" në Durrës verën e vitit 2018. Kujtojmë se Policia sekuestroi në port 3.4 milionë euro, të cilat po futeshin në Shqipëri në mënyrë ilegale dhe të padeklaruara, ndërsa për këtë ka vënë në pranga 4 persona në Shqipëri. Hetime po vazhdojnë paralelisht edhe në Belgjikë. "Vendoset sekuestro preventive mbi llogari bankare, truall dhe ranishte në pronësi të pjesëtarëve të një grupi të strukturuar kriminal", bëri të ditur dje Policia. Më tej, në njoftim thuhet se Njësia Hetimore pranë Task- Forcës Speciale Qendrore, nën drejtimin e Prokurorisë pranë Gjykatës së Shkallës së Parë për Krime të Rënda dhe në bashkëpunim me Agjencinë për Administrimin e Pasurive të Sekuestruara dhe të Konfiskuara, zhvilloi fazën e dytë të operacionit policor "BIZARK", për veprat penale "Pastrimi i produkteve të veprës penale ose i veprimtarisë kriminale", në bashkëpunim dhe "Grup i strukturuar kriminal", faza e parë e të cilit është finalizuar në datën 24.06.2018. "Në këtë kuadër, u bë ekzekutimi i vendimit të Gjykatës, duke vënë nën sekuestro preventive disa pasuri të luajtshme dhe të paluajtshme të shtetasve shqiptarë me iniciale: A. M., A. V., A. D., Gj. C. dhe K. M..", shkruhet më tej në njoftimin e Policisë. Sipas burimeve zyrtare, bëhet me dije se vazhdojnë veprimet procedurale në bashkëpunim me Agjencinë për Administrimin e Pasurive të Sekuestruara dhe të Konfiskuara për kalimin në administrim nga shteti të të gjitha këtyre pasurive. Pasuritë janë vënë nën sekuestro me vendim të Gjykatës së Shkallës së Parë për Krime të Rënda.