LISTA E PERFITUESVE
Kësti i tretë, 5 dokumentet e reja për ish- të përndjekurit
Financat sqarojnë pesë dokumentet që duhen për të marrë dëmshpërblimin. 1700 emrat e të përndjekurve, familjarët e të cilëve marrin këstin e tretë
Dëshmi trashëgimie, certifikatë vdekjeje e ishtë dënuarit, certifikatë e trungut familjar, kopje e kartës së identitetit dhe numër llogarie.
Janë këto pesë dokumentet që duhet të dorëzojnë trashëgimtarët e ish- të përndjekurve që nuk jetojnë pranë Ministrisë së Financave për të marrë këstin e tretë të dëmshpërblimit. Pagesat nisin të kryhen në momentin kur secili prej përfituesve ka dorëzuar dokumentacionin e nevojshëm. Për plotësimin e dosjes, trashëgimtarët kanë tre muaj afat. Gazeta boton sot emrat e 1700 të dënuarve, që janë në radhë për të marrë dëmshpërblimin. Për këto dosje të shqyrtuara rishtazi, afati skadon në fund të muajit shtator. Pra, deri në fund të shtatorit familjarët e tyre kanë mundësi që të dorëzojnë dorazi ose nëpërmjet shërbimit postar dokumentet që kërkohen. Sa i takon certifikatës së trungut dhe certifikatës familjare, ato mund të aksesohen edhe online. Kjo do të thotë, që nga ana e trashëgimtarëve mjafton vetëm një autorizim me shkrim i lëshuar nga përfituesi, më pas do të jenë punonjësit e Ministrisë së Financave ata të cilët do të sigurojnë këto dokumente përmes sistemit. Kujdes duhet treguar edhe me numrat e llogarisë bankare. Kanë qenë jo pak pagesa që janë kryer nga Drejtoria e Thesarit, por janë bllokuar për shkak se numrat e llogarisë bankare nuk kanë rezultuar aktiv. Në këto kushte, për të shmangur këto situata, që mund të sjellin vonesa në marrjen e këstit, duhet që numri i llogarisë të jetë hapur brenda këtij viti.