Haradinaj jep dorëheqjen i përlotur: Më thirrën përsëri në Hagë
“Vendi të shkojë në zgjedhje, është shumë gabim që po i kërkohet Kosovës një çmim i papërballueshëm për marrëveshje”
Në një vendim sa të beftë aq edhe tronditës, Ramush Haradinaj, Kryeministri i Kosovës, ka dhënë dorëheqjen pas një ftese të papritur të paraqitur nga Gjykata Speciale në Hagë, e themeluar nga autoritetet në Kosovë, nën nxitje masive të ndërkombëtarëve.
Kjo është hera e dytë që Haradinaj, si një burrështetas për t’u respektuar, jep dorëheqjen nga posti i lartë për t’u gjykuar si një qytetar i thjeshtë i Kosovës dhe jo një Kryeministër me akuza ( hera e parë në 2004). Dy herë të tjera Haradinaj është gjykuar në Hagë ku ka dalë i pafajshëm dhe vendimi i kësaj here, i cili ishte i papritur për të gjithë, është hera e tretë që e çon ish- luftëtarin e UÇK- së për t’u përballur me të njëjtat akuza, kësaj here në një strukturë të re të ngritur pikërisht për të gjykuar “krimet e luftës” të shqiptarëve të Kosovës, që luftuan për të mbrojtur popullin e tyre nga masakrat e Ushtrisë serbe të Millosheviçit. Largimi i Haradinajt nga qeveria pritej, pasi përveç lëvizjeve të opozitarëve për shkarkimin e Kryeministrit në Kosovë, zyrtarë të lartë amerikanë që kishin kërkuar heqjen e taksës ndaj produkteve serbe ( taksa u quajt pengesë nga Beogradi për vazhdimin e dialogut Kosovë- Serbi), kishin paralajmëruar se me gjithë këto qëndrime kundër “drejtuesit mund të ndryshohen” dhe Haradinaj ishte përgjigjur publikisht: “Mua mund të më rrëzojnë, por Kosovën nuk mund ta rrëzojnë. Taksa qëndron, pasi është në interes të Kosovës”.
Disa muaj pas kësaj, Haradinajn e ftojnë në Hagë dhe kjo ishte mënyra më e paparashikuar e largimit të tij nga qeveria. Zyrtarë dhe politikanë të lartë të pozitës dhe opozitës kanë shprehur keqardhjen për largimin në këtë formë të Haradinajt. Vetë Kryeministri në largim, gjatë deklaratës së tij për dorëheqjen, për të cilën zgjodhi ta lajmërojë popullin njëkohësisht me autoritetet e tjera të larta të Kosovës nëpërmjet mediave, u shfaq i emocionuar dhe i përlotur. “Kam dhënë dorëheqje të parevokueshme prej funksionit të kryetarit të qeverisë. Arsyeja është se jam ftuar që të intervistohem si i dyshuar nga dhomat posaçme të Gjykatës së Specializuar. Javën tjetër do ta kem intervistimin dhe kam vlerësuar se atje nuk mund të paraqitem si kryetar i qeverisë, por si një qytetar i Kosovës. Për me e ruajt nderin e kryetarit të qeverisë edhe të shtetit, kam menduar se është e drejtë me e marrë këtë vendim”, tha Haradinaj. I përlotur ai tha: “Emocional mund të jem, por lotët nuk po i shoh, nuk e kam zgjedh këtë realitet, nuk mund të shkoj në këtë mënyrë”. Kryeministri në largim theksoi gjatë dorëheqjes së tij se Kosova është një shtet me kufij të paprekshëm. “Do të kryej detyrat e mia, do ta mbroj Kosovën si luftëtar i vendit tim. Ndërsa pjesa politike është shumë gabim që po i kërkohet Kosovës një çmim i papërballueshëm për arritjen e një marrëveshjeje. Mendoj se është e gabueshme prej lidershipit të Kosovës me ofru oferta të gabueshme, duhet të bëhet kujdes”, pohoi ai. Haradinaj kërkoi zgjedhje të reja dhe tha se qeveria e tij do t’i kryejë punët deri në zgjedhjet e ardhshme. Më pas ka postuar në “Facebook” një mesazh, ku mes të tjerash shkruhej se “Pastërtia ime dhe e luftës së UÇK- së, e konfirmuar nga dy aktgjykime, nuk mund të njolloset nga askush dhe asnjëherë. Shteti im është Kosova, e paprekshme në multietnicitet, shumëgjuhësi, në territor e kufij. Do t’i shërbej me besnikëri, gjithë jetën, POPULLIT, ATDHEUT DHE SHTETIT TIM, KOSOVËS. Faleminderit!”