Meta: Të kalohet kriza e rëndë që ka përfshirë vendin
“Rikthim urgjent në shinat e demokracisë dhe shtetit ligjor, për t’i shërbyer çeljes së negociatave”
Presidenti Meta bëri apel për tejkalimin e krizës politike që ka përfshirë vendin. Gjatë një takimi lamtumire me ambasadoren e Sllovenisë në Shqipëri, Lea Staniçiç, Presidenti theksoi se vendi duhet të kthehet sa më parë në shinat e demokracisë dhe të shtetit ligjor.
- Sipas njoftimit për media të zyrës së shtypit të Presidencës, bëhet me dije se kreu i shtetit e ka falënderuar diplomaten sllovene për përkrahjen në rrugëtimin e europian të Shqipërisë, duke theksuar se: “Kjo mbështetje na inkurajon për të shtuar përpjekjet tona për kapërcimin e krizës së rëndë ku ndodhet vendi dhe rikthimin urgjent në shinat e demokracisë dhe shtetit ligjor, për t’i shërbyer objektivit strategjik të çeljes së negociatave të anëtarësimit me Bashkimin Europian gjatë mbledhjes së Këshillit të 17- 18 tetorit”. Pjesë e bisedës ndërmjet Presidentit Meta dhe ambasadores në largim të Sllovenisë ishin edhe marrëdhëniet ndarjet dy vendeve, si edhe hapja e negociatave për anëtarësim të Shqipërisë me Bashkimin Europian. Nga njoftimi i zyrës së shtypit të Presidencës bëhet me dije se Presidenti Meta, pasi vlerësoi kontributin e ambasadores Stançiç për forcimin e gjithanshëm të bashkëpunimit ndërmjet dy vendeve tona mike, vlerësoi se marrëdhëniet ndërmjet Shqipërisë e Sllovenisë janë shumë të mira dhe se ekzistojnë hapësirat për të forcuar më tej ato ekonomikotregtare. “Dëshmi e ecurisë mjaft të mirë të marrëdhënieve janë vizitat e shpeshta të autoriteteve më të larta sllovene, të cilat kulmuan me vizitën e Presidentit Pahor në Shqipëri”, theksoi kreu i shtetit.
DEKRETI Kriza politike në vend duket se u thellua më shumë pas dekretit të Presidentit Meta, i cili caktoi datën 13 tetor për zhvillimin e zgjedhjeve vendore. Ky vendim i Presidentit nuk u pranua nga ana e maxhorancës dhe as nga Komisioni Qendror i Zgjedhjeve, i cili vijoi punën me përmbylljen e procesit zgjedhor të 30 qershorit. Por ky dekret i Presidentit vijon të mbetet në sirtarët e protokollit të Qendrës së Botimeve Zyrtare. Kanë kaluar më shumë se 3 javë që kur kreu i shtetit firmosi datën 13 tetor për zhvillimin e zgjedhjeve vendore, gjë e cila nuk është botuar në Fletoren Zyrtare. Qendra e Botimeve Zyrtare, nga ana e saj ka botuar dhe u ka dhënë fuqi ligjore disa akteve të tjera të kreut të shtetit të firmosura më vonë si dekretime ligjesh, dhënie apo lënie të shtetësisë shqiptare etj.. Pavarësisht kësaj, Meta ka theksuar se është i gatshëm ta negociojë datën 13 tetor në rast se i shërben zgjidhjes së krizës dhe hapjes së negociatave. Në një prononcim për media, ai është shprehur se: “Unë jam fleksibël për ta parë çështjen e 13 tetorit, meqenëse mund të ketë krijuar ndjenjën e tersit te dikush. Për mua nuk ka rëndësi. Për mua ka rëndësi 17- 18 tetori. Atë nuk kam fuqi as unë dhe asnjeri që ta ndryshojë, sepse atë e ka Bashkimi Europian. E theksoj edhe një herë: Kemi futur mik të fortë për ta shtyrë provimin nga qershori, që të na japin mundësi për të kaluar në vjeshtë. Nuk e kalojmë dot këtë provim pa bërë zgjedhje gjithëpërfshirëse, të standardeve demokratike”.