Gjeologjiku, çelet fondi për rindërtimin e godinës
Balluku- kompanive: Investoni për profesionistët e së ardhmes
Vetëm pak javë pasi iu rikthye pronësia e godinës me vendim qeverie, vjen mundësia që studentët dhe pedagogët e Fakultetit të Gjeologji- Minierave të mësojnë në kushte më të mira. Kjo, përmes nismës së Ministrisë së Infrastrukturës dhe Energjisë, e cila, në kuadër të premtimeve të "Paktit për universitetin", ka ngritur një fond solidariteti ku fton kompanitë minerare të kontribuojnë për profesionistët e së ardhmes. "Për shkak të kërkesave që ne duhet të përmbushim, për sa u përket ambienteve, laboratorëve dhe të gjithë logjistikës suportive që i duhet një fakulteti për të operuar, ky fakultet ka nevojë për një rikonstruksion të thellë. Ky rikonstruksion ka një kosto, sipas projektit të përpiluar nga një tjetër fakultet, ai i Arkitekturës dhe Urbanistikës. Këto fonde nuk janë ekzistuese për momentin dhe çfarë ne po kërkojmë nga të gjitha subjektet është mbështetje financiare për Fakultetin e Gjeologjisë", u shpreh ministrja Belinda Balluku në takimin e zhvilluar një ditë më parë me përfaqësues të kompanive minerare si dhe përfaqësues nga Fakulteti Gjeologjik. Gjithçka do të jetë transparente. Çdo kontribuues mund të kontrollojë fondet, për të cilat do të vihet në dijeni edhe qeveria. "Kjo ësht kryeni në fushën që mbuloni". Balluku mori direkt feedback pozitiv nga kompanitë prezente, të cilat e shikojnë këtë kontribut si diçka që do t'u kthehet vetë atyre në të ardhmen e afërt. "Iniciativa që është ndërmarrë është shumë e rëndësishme sepse në fund të fundit kjo u vlen bizneseve, sepse do të rrisin kapacitetet dhe më kryesorja cilësinë e këtyre kapaciteteve. Sepse, aktualisht, bizneset kanë mangësi", u shpreh Pandi Bombaj. Sapo të mblidhet fondi i nevojshëm, godina e Fakultetit të Gjeologjisë dhe Minierave do t'i nënshtrohet një rikonstruksioni të plotë, duke e kthyer atë në një strukturë moderne në funksion të një procesi sa më të plotë dhe efikas të mësimdhënies. Gjatë bisedës me ta, ministrja foli shkurtimisht edhe për pronësinë e godinës, duke risjellë në vëmendje gjithë procedurën që u ndoq me qëllim që ky objekt t'i mbetej këtij fakulteti.