Presidentja e re e KE, pro hapjes së negociatave
Komisioni Europian nuk ka ndryshuar qëndrim për sa i përket hapjes së negociatave për anëtarësim ndërmjet Shqipërisë dhe Bashkimit Europian. Ndonëse tanimë ka ndryshuar drejtimi i Komisionit Europian dhe në krye është vendosur gjermania Ursula von der Leyen, shefja e re e KE- së ka vijuar me mbajtjen e të njëjtit qëndrim të paraardhësit të saj, Junker. Duke folur për gazetën gjermane “Der Spiegel”, Presidentja e Komisionit Europian, Ursula von der Leyen, është shprehur pro hapjes së negociatave për anëtarësim për Shqipërinë dhe Maqedoninë e Veriut, duke shtuar se BE- ja duhet t’i japë dorën Shqipërisë pasi nëse mbyllen dyert, dëmtohet vetë Europa. “Jam në favor të hapjes së negociatave. Ne duhet të hapim negociatat e pranimit me vendet sapo Këshilli Europian të arrijë në përfundimin se kriteret janë përmbushur. Ne duhet t’i japim dorën Shqipërisë. Duhet të shtrëngojmë dorën tonë ndaj këtyre shteteve, ne ndajmë të njëjtin kontinent, të njëjtën histori, ne jemi fqinjë dhe nëse e mbyllim derën për këtë rajon, dëmtojmë veten”, ka deklaruar Presidentja e KE- së, Von der Leyen. Sipas gazetës gjermane “Der Spiegel”, BE- ja u ka ofruar disa vendeve të Ballkanit Perëndimor perspektivat e pranimit për vitin 2025, por ka shtyrë kohët e fundit fillimin e negociatave për Maqedoninë e Veriut dhe Shqipërinë.
Ursula von der Leyen, përpara se të zgjidhej si Presidente e Komisionit Europian ka mbajtur detyrën e ministres së Mbrojtjes të Gjermanisë. Ajo do të nisë detyrën si pasuese e Jean- Claude Juncker në krye të Komisionit më 1 nëntor dhe do të jetë gruaja e parë që do të drejtojë ekzekutivin europian. Von der Leyen është gjermania e parë që do të drejtojë ekzekutivin e BE- së që nga modernizimi i Bashkimit Europian. Gjatë votimit në Parlamentin Europian, Von der Leyen mori 383 nga 747 vota të mundshme, vetëm nëntë më shumë se minimumi për zgjedhjen e saj. 327 ligjvënës votuan kundër saj dhe 22 abstenuan. Pasi u komunikua votimi përfundimtar, ajo tha se qëllimi i saj është një Europë e fortë dhe e bashkuar. Ky qëndrim i saj pritet nëse do të ketë efekt në vendimin që do të marrë Këshilli i Ministrave i Bashkimit Europian për hapjen e negociatave për anëtarësim me Shqipërinë, por edhe me Maqedoninë e Veriut. Konkretisht, në datat 17 dhe 18 tetor pritet të mblidhet Këshilli i Ministrave të BE- së, ku në përbërje janë të gjithë ministrat e Jashtëm të vendeve anëtare, të cilët do të duhet të vendosin unanimisht për hapjen e negociatave për Shqipërisë dhe për Maqedoninë e Veriut. Në votimin e parë që u bë në qershor u vendos shtyrja e saj për disa muaj deri të tetor, për shkak të zgjedhjeve europiane.