Basha: Rama privatizoi Drejtësinë, po vjedh qytetarët
Kreu i opozitës
Kryetari i Partisë Demokratike, Lulzim Basha, zhvilloi dje një takim me strukturat e PD- së në Lezhë.
Gjatë takimit, kreu i PD- së e cilësoi Kryeministrin Rama si problemin më të madh për ekonominë, papunësinë dhe shkaktarin e shkatërrimit të drejtësisë. Gjatë takimit Basha iu referua vendimit të Gjykatës së Durrësit, duke e cilësuar si skandal, ndërsa theksoi se me kërkesën e dyshes Rama- Dako ndryshoi në mënyrë të paprecedent vendimin e saj të mëparshëm, për pavlefshmërinë e mandatit të prodhuar nga 30 qershori. "Kjo tregon se drejtësia është tërësisht e privatizuar nga Edi Rama. 3 vjet pas miratimit të Reformës në Drejtësi, drejtësia është tërësisht e kapur nga Rama. Kjo është arsyeja pse drejtësia nuk funksionon. Edi Rama është Kryeministri më hajdut, më arrogant dhe më mashtrues në historinë e Shqipërisë. Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Nëse shqiptarët nuk kanë të hanë, është sepse paratë e tyre i ka vjedhur Edi Rama. Miliarda euro janë vjedhur, abuzuar dhe shpërdoruar këto 6 vjet, të gjitha kanë përfunduar në xhepat e Ramës dhe janë shpërdoruar për tekat e Ramës në luks dhe fasada", theksoi kryedemokrati. Kryetari i Partisë Demokratike u ndal gjatë takimit edhe te koncesioni për ndërtimin e rrugës MilotBalldren. Sipas tij, kjo kontratë e miratuar nga Parlamenti është vrasje e shpresës. "Nëse shqiptarët janë pa punë, është sepse ekonominë, paratë dhe mundësitë ekonomike i kanë marrë oligarkët dhe klientët e Ramës. Nëse shqiptarët nuk kanë shpresa, është sepse shpresat e tyre i ka vrarë Rama me oligarkët hajdutë, siç po bën edhe këtu në Lezhë me kusarinë Milot- Balldren. Edi Rama është artist i mashtrimit. Çdo gjë që ka premtuar, çdo gjë që ka thënë, ka qenë mashtrim me qëllim për të vjedhur. Çdo projekt, program dhe politikë është mashtrim për shqiptarët në shërbim të oligarkëve", theksoi kreu i PD- së.
ZGJEDHJET Kryedremorkati Lulzim Basha u ndal edhe te kriza politike në vend, duke theksuar se vetëm përmes zgjedhjeve të lira dhe të ndershme shumica morale e vendit mund të kthehet në shumicën qeverisëse të tij. "30 qershori në këtë pikëpamje vetëm ka përforcuar dhe konfirmuar si të drejta shqetësimet dhe rrugëdaljet nga kriza që kemi parashtruar: një qeveri tranzitore pa Edi Ramën, çuarjen para drejtësisë të të gjithë politikanëve dhe kriminelëve, të faktuar para të gjithë botës si hajdutët e zgjedhjeve dhe zgjedhje të parakohshme", theksoi në takimin e Lezhës kreu i opozitës, Lulzim Basha.