Rama, bizneseve: Zbatoni ligjin ose pasojat të rënda

Kryeministri njofton zero tolerancë për abuzuesit me kuponin

Këtë sezon veror, qeveria shqiptare është fokusuar në aksionin antiinformalitet për evidentimin dhe gjobitjen e bizneseve, që nuk lëshojnë kupon tatimor.

Kryeministri Edi Rama u bëri dje thirrje bizneseve të regjistrohen për të ushtruar aktivitetin në mënyrë të ligjshme, duke shmangur pasojat e rënda ligjore. Me anë të një statusi në rrjetet sociale, kreu i qeverisë ka përsëritur thirrjen për të gjithë bizneset që të regjistrohen dhe të lëshojnë kuponin tatimor. "Vijon në të gjithë territorin kontrolli dhe bllokimi i subjekteve abuzuese. Regjistrohuni dhe lëshoni kuponin, sepse pasojat ligjore janë të rënda. Zero tolerancë", shkruan Edi Rama në "Facebook". Pak ditë më parë, Drejtoria e Tatimeve me mbështetje direkte të qeverisë nisi aksionin për kontrollin e bizneseve në vend. Ky aksion ka si qëllim sensibilizimin e bizneseve për të punuar brenda rregullave ligjore. Deri më tani është bërë bllokimi i dhjetëra bizneseve, kryesisht bare, restorante, hotele apo shtëpi pushimi në zonat bregdetare të vendit. Ky aksion i qeverisë ka nisur prej disa ditësh dhe pritet që të vijojë përgjatë gjithë sezonit turistik, pasi edhe fokusi i qeverisë është vendosur kryesisht në zonat bregdetare të vendit, ku edhe aktiviteti tregtar është më i lartë. Kjo lëvizje e qeverisë nuk ka kaluar edhe pa reagimet e opozitës, e cila i ka cilësuar si një masë represive ndaj bizneseve kontrollet e shpeshta të Tatimeve përgjatë këtij sezoni veror. Gjithsesi, efektet e këtij aksioni pritet të shihen në muajt e vjeshtës, kur të dali edhe raporti 3- mujor për rritjen ekonomike në vend, ku do të verifikohet nëse janë rritur të ardhurat nga tatim- taksat për shkak të lëshimit të kuponit tatimor. Kjo është e disata herë që qeveria shqiptare ndërmerr një masë të tillë.