Pranimet e reja, kushtet e konkurrimit në gjashtë fakultetet e universitetit

Përzgjedhja e më të mirëve për vitin 2019- 2020 do të bëhet mbi notën mesatare të gjimnazit, atë të Maturës Shtetërore dhe gruplëndët formuese ( të ndryshme për çdo program studimi). Këto do të përcaktojnë fituesit në Universitetin e Tiranës për vitin e ri akademik 2019- 2020. Ndërsa dy treguesit e parë dihen për çdo garues, një peshë jo të vogël dhe me rol përcaktues do ta luajnë lëndët që departamentet kanë vendosur t’u japin më shumë vlerë për të pranuar më të mirët. Te Fakulteti i Drejtësisë ato kanë 40% të pikëve, ndërsa pjesa tjetër ndahet midis dy komponentëve të lartpërmendur. Të njëjtën metodologji ka përdorur edhe Fakulteti i Shkencave Sociale, por me lëndë të tjera formuese ( qytetari, filozofi, psikologji dhe sociologji), të cilat lidhen me programet që ofron. Tek Ekonomiku, matematika, ekonomia, fizika dhe gjuha e huaj janë lëndët specifike, të cilave u jepet më shumë rëndësi për maturantët që aspirojnë një degë ekonomiku. Ato kanë të njëjtën peshë sa mesatarja e përgjithshme e gjimnazit. Histori- Filologjia e ka ruajtur të pandryshuar formulën me të cilën do të pranojë studentët e vitit të ardhshëm. Tri vitet e shkollës së mesme kanë gjithë peshën kryesore, 80%, ndërsa mesatarja e thjeshtë e katër provimeve të Maturës Shtetërore do të vlerësohet me 20%. Departamente të ndryshme në Fakultetin e Shkencave të Natyrës kanë përcaktuar varietet kriteresh pranimi. Gjuhët e Huaja gjithashtu kanë ndjekur të njëjtën linjë. Rezultati kumulativ i mesatares së gjimnazit, përfshirë dhe notat e Maturës Shtetërore, do të përcaktojnë shumë thjesht fituesit në Fakultetin e Gjuhëve të Huaja, kriter ky i njëjtë me vitin e shkuar. Për Anglishten, një trend i preferuar veçanërisht viteve të fundit, është hequr testimi.