Kolegji ricertifikon 30 qershorin, pranon kërkesat e PS për këshillat bashkiakë
Rrëzohen 5 ankimimet e Bindjes Demokratike. Topollari: Kemi ngritur një sistem zgjedhor, ku mbrohet ai që vjedh votat
Kolegji Zgjedhor vendosi dje të shpërndajë mandatet e këshilltarëve bashkiakë të 7 njësive vendore, duke i hapur rrugë betimit të kryebashkiakëve të parë, të dalë nga procesi zgjedhor i 30 qershorit.
Anëtarët e Kolegjit Zgjedhor pranuan dje kërkesat e Partisë Socialiste, të cilët kërkuan ndihmën e Kolegjit, pasi Komisioni Qendror i Zgjedhjeve dështoi t’u jepte mandatin këshilltarëve. Vendimi i marrë dje nga Kolegji Zgjedhor mund të quhet edhe një ricertifikim i procesit zgjedhor të 30 qershorit. Kjo, pasi Presidenti i Republikës ka nxjerrë një dekret, i cili anulonte këtë datë dhe caktonte datën 13 tetor për zhvillimin e zgjedhjeve vendore. Por Kolegji Zgjedhor, dje, mori nën shqyrtim kërkesat e Partisë Socialiste për shpërndarjen e mandateve të këshilltarëve bashkiakë, kërkesë e cila u miratua, duke rrëzuar në mënyrë indirekte për herë të dytë Presidentin Meta. Partia Socialiste iu drejtua kësaj Gjykate, pasi Komisioni Qendror i Zgjedhjeve nuk ka numrin e votave të nevojshme për të marrë vendime të tilla. Kjo, sepse Kodi Zgjedhor ka përcaktuar se shpërndarja e mandateve kërkon shumicë të cilësuar të votave të anëtarëve të KQZsë, pra, së paku 5 vota pro. Aktualisht, në Komisionin Qendror të Zgjedhjeve janë pesë anëtarë, por kryetari Klement Zguri ka kërkuar që të bëhet një hetim i thelluar administrativ dhe për rrjedhojë ka dhënë votën kundër për të gjitha kërkesat për shpërndarjen e këshillave bashkiakë.
ANKIMIMET Kolegji Zgjedhor mori në shqyrtim dje edhe pesë kërkesa ankimore të Bindjes Demokratike. Bindja Demokratike kishte paraqitur në Kolegjin Zgjedhor kërkesën për të shpallur të pavlefshme zgjedhjet në pesë bashki të vendit. Sipas përfaqësuesit ligjor të BD- së, Fabian Topollari, vëzhguesit e këtij subjekti zgjedhor kanë konstatuar shkelje gjatë procesit të votimit. Gjyqtarët nga ana e tyre i kërkuan prova Topollarit, por ky i fundit theksoi se provat janë brenda kutive të votimit dhe për rrjedhojë kishte paraqitur kërkesën ankimore pranë Kolegjit Zgjedhor, pasi më herët Komisioni Qendror i Zgjedhjeve kishte votuar kundër hapjes së kutive. Pas vendimit të marrë nga Kolegji, i cili rrëzoi të gjitha pretendimet e BD- së, përfaqësuesi ligjor theksoi se tanimë është ngritur një sistem ku mbrohet ai që vjedh votat. “Partia kryesore ka nevojë të vjedhë vota dhe vjedh vota kur ka një garë minimaliste. Nga ana tjetër kemi ngritur një sistem zgjedhor ku mbrohet ai që vjedh votat dhe jo transparenca”, tha Topollari. Por në replikë me të, përfaqësuesi ligjor i PS- së theksoi para kamerave, se pretendimet e BD janë të paqarta dhe thjesht politike, pa prova konkrete. “Pretendimet e BD janë thjesht pretendime politike. Pretendime të një stine vere, që nuk e di se me kë e ka, a e ka me procesin, me votimet, por ju them që vetëm me procesin zgjedhor nuk ka asnjë pretendim”, theksoi përfaqësuesi i PS- së, Eridian Salianji. Kolegji Zgjedhor rrëzoi dje edhe pretendimin e kryetarit në detyrë të Bashkisë së Finiqit, Leonidha Hristos, i cili nuk e njeh rezultatin e dalë në këtë bashki, pasi u mund nga kandidati i koalicionit të PS- së.