“Drejtësia ishte e kapur, donin ta mbanin Shqipërinë prapa”
Mosses: Jemi krah jush, Reforma i jep një formë të re së ardhmes
Shtetet e Bashkuara të Amerikës do të vijojnë të qëndrojnë në krah të Shqipërisë deri në vënien në zbatim të Reformës në Drejtësi.
Ky ishte pohimi që bëri dje e ngarkuara me punë në Ambasadën Amerikane, Leyla Mosses, gjatë inaugurimit të "Pallatit të Drejtësisë". "Shtetet e Bashkuara kanë qëndruar krah Shqipërisë dhe i kanë nxitur këto ndryshime të mëdha. Ne qëndruam krah Shqipërisë kur reformat u miratuan njëzëri tre vjet më parë. Ne kemi qëndruar krah Shqipërisë kur filloi rivlerësimi dhe ndërsa ka pastruar sistemin e drejtësisë. Ne kemi qëndruar krah Shqipërisë gjatë krijimit të Këshillave të Gjyqësorit dhe të Prokurorisë. Ne jemi duke qëndruar krah Shqipërisë ndërsa po ngrihet SPAK- u. Jini të sigurt, ne do të vazhdojmë të qëndrojmë krah Shqipërisë ndërsa Reforma në Drejtësi i jep një formë të re së ardhmes tuaj", theksoi zëvendësambasadorja e SHBA- së në Tiranë. Në vijim të fjalës së saj, ajo kujtoi miratimin e ndryshimeve kushtetuese, ku theksoi se mesnata e 22 korrikut solli ndryshimin e sistemit të dreqësisë që, sipas saj, ishte i kapur me kohë nga korrupsioni. "Votimi filloi pas mesnatës, më 22 korrik. Ishte unanim- të gjithë votuan për të bërë këto ndryshime historike. Ky votim tregon se çfarë mund të bëjnë udhëheqësit e Shqipërisë kur punojnë së bashku për të mirën e përbashkët. Prej orës 1 të mëngjesit, Shqipëria kishte një të ardhme të re, sepse politikanët shqiptarë kishin vizionin për të luftuar së bashku korrupsionin dhe për të ecur përpara drejt realizimit të ëndrrave të pranimit në BE. Kjo ishte tre vjet më parë. Shumë gjëra kanë ndodhur që atëherë. Shqipëria miratoi ligje për zbatimin e Kushtetutës dhe më pas krijoi një Komision dhe një Kolegj Apelimi për rivlerësimin kalimtar të gjyqtarëve dhe prokurorëve ( vetingun). Bashkimi Europian dhe Shtetet e Bashkuara krijuan Operacionin Ndërkombëtar të Monitorimit. Ky model i rivlerësimit të gjyqtarëve dhe prokurorëve ka qenë themeli për pjesën tjetër të reformave që duhet të ndodhin. Tani, një numër i madh - mbi 15 për qind - i gjyqtarëve dhe prokurorëve janë rivlerësuar. Disa kanë kaluar rivlerësimin dhe shumë kanë dështuar. Kjo përfshin gjyqtarët në Gjykatën e Lartë dhe në Gjykatën Kushtetuese. Disa thonë se ky është një problem, por ne besojmë se kjo tregon që rivlerësimi po funksionon dhe nënvizon se pse Reforma në Drejtësi ishte e nevojshme: Sistemi i vjetër i drejtësisë ishte kapur shumë kohë më parë. Ishte i kapur nga korrupsioni dhe nga ata që veprojnë në hije për të mbajtur Shqipërinë prapa. Reforma në Drejtësi e theu atë kapje të paligjshme të sistemit të drejtësisë dhe po ua kthen atë njerëzve", theksoi ajo.