Xhafaj: Akuzat për drejtësinë, për ta delegjitimuar
"Prokuroria ishte e mbërthyer nga drejtues të korruptuar"
Në kuadër të trevjetorit të ndryshimeve kushtetuese për Reformën në Drejtësi, Kuvendi organizoi një tryezë për promovimin e botimit të dytë parlamentar mbi këtë proces. Gjatë fjalës së tij në këtë aktivitet, ish- kryetari i Komisionit të Posaçëm Parlamentar për Reformën në Drejtësi, Fatmir Xhafaj, theksoi se "periudha tranzitore do të kapërcehet shumë shpejt dhe se gjërat do të shkojnë në vendin e tyre, ku të gjithë do të shohin qartazi vlerat e asaj çfarë kemi ideuar dhe ndërtuar përmes vështirësive e pengesave të shumta". Gjatë fjalës së tij, ish- ministri i Brendshëm u ndal edhe te kritikat e opozitës ndaj Reformës në Drejtësi, për të cilat argumenton se "disa vijnë nga mosnjohja, disa nga xhelozia e natyra nihiliste e autorëve, por një shumicë janë në funksion të qëllimit për delegjitimimin e procesit, zbehjen e vlerave dhe besueshmërisë së tij". "Dikush qan hallin e drejtësisë së vonuar, duke kujtuar numrin e madh të dosjeve në rafte, disa të tjerë nuk dinë se çfarë kërkojnë dhe çirren se reforma po kapet! Harrojnë se deri dje Gjykata e Lartë ishte aty e tëra dhe ishin mijëra çështje në raftet e saj prej vitesh, ashtu sikundër janë me mijëra dosje në pritje dhe me vite vonesë apo në zvarritje dekadash në shkallët e tjera të gjyqësorit.
Sigurisht, më mirë një vit vonesë se sa një drejtësi e blerë dhe e shitur si mall nën pushtetin e fuqisë së pushtetit apo të fortit të parasë apo krimit. Ndërkohë që deri dje, Gjykata Kushtetuese, Gjykata e Lartë dhe çdo institucion i sistemit dhe vetë karriera e gjyqtarëve e prokurorëve përcaktohej nga politika, nga vullneti i pushtetit të radhës, ndërsa drejtësia e re që po ngremë përmes kësaj reforme garanton që qëndrueshmëria, karriera dhe promovimi i prokurorëve dhe gjyqtarëve nuk ka asnjë lidhje me politikën dhe pushtetin, po me vlerat dhe integritetin", nënvizon Xhafaj. Ai bëri një krahasim me drejtësinë e para tre viteve me të tanishmen, duke nënvizuar se: "Prokuroria e djeshme ishte e mbërthyer nga drejtues të paaftë, të korruptuar dhe shërbëtorë militantë politikë dhe nuk mund të ketë asgjë të përbashkët me institucionet e reja të drejtësisë penale, me SPAK dhe BKH të formuar me gjyqtarë, prokurorë e policë të skanuar në filtrat e vetingut, të emëruar mbi një proces konkurrimi pa asnjë pikëlidhje me politikën dhe kryesorja nën një monitorim të fortë ndërkombëtar nga misionet e asistencës të SHBA- ve e BE- së". Fjalë përshëndetëse në këtë aktivitet mbajti edhe Kryetari i Kuvendit, Gramoz Ruçi, i cili theksoi se kjo reformë është pa kthim. "Dëshiroj të rikonfirmoj qëndrimin tim personal dhe të Kuvendit të Shqipërisë se Reforma në Drejtësi është e pakthyeshme dhe e panegociueshme. Për arsyen e thjeshtë se ajo është e dëshiruar për të gjithë qytetarët dhe se destinacioni europian, fati dhe e ardhmja e Shqipërisë nuk mund të negociohen. Por ritheksoj se as Reforma në Drejtësi, as vetingu, as ngritja e institucioneve të reja të sistemit nuk janë qëllim në vetvete. Sfida e vërtetë e reformës është dhënia e drejtësisë dhe barazia reale e shtetasve para ligjit. Për këtë, secili në këtë sallë e jashtë saj duhet të reflektojë e të zhvillojë përgjegjësitë e veta", tha ai.