Pakti për universitetin, raporti: Nuk solli progres
“S’ka veting për pedagogët, biblioteka dixhitale ineficiente”
Pakti i qeverisë, në përgjigje të zemërimit studentor të dhjetorit të vitit të shkuar, rezulton me 11 vendime dhe 4 urdhra boshe, së paku në gjashtë muajt e parë të këtij viti.
Në këtë përfundim ka arritur organizata joqeveritare “Qëndresa qytetare” në vëzhgimin e detajuar të zbatimit të pikave në paktin për universitetin. Sipas saj, deri tani, nuk është shënuar asnjë progres për përmirësimin e cilësisë së arsimit, përzgjedhja e anëtarëve të bordit nga studentët u bë pa transparencë e përtej afateve, ndërsa konviktet dhe karta studentore janë zbatuar vetëm pjesërisht. Nisur nga kjo, organizata i bën thirrje Ministrisë së Arsimit dhe qeverisë që në pak muaj të mbetur nga ky vit, të marrë përsipër përgjegjësitë që i ka ngarkuar vetes. ECURIA E PAKTIT Ndër të paktat aspekte pozitive të paktit, është fakti se studentët janë pyetur, edhe pse ende nuk janë shpallur rezultatet e sondazhit kombëtar, ndonëse duhej të ishte bërë publik në muajin maj. Por, nga ana tjetër, ky sondazh ka shmangur fenomene të rënda në arsim, si korrupsioni për raste dhe emra specifikë, të cilët vetë studentët i kanë bërë publikë gjatë protestës dhe nuk është ndërmarrë asnjë masë për ta. Por jo vetëm kaq. Pedagogëve nuk iu është bërë ende as vetingu i titujve shkencorë, duke e bërë këtë një premtim të pambajtur të qeverisë, e cila nuk resht së akuzuari universitetet për këtë përgjegjësi. Në gjashtë muajt e parë të vitit, rezulton se asnjë titull shkencor apo kontroll antiplagjiaturë nuk është kryer. Sa i takon kartës studentore, sipas monitorimt, përfituesit e vetëm janë studentët e kryeqytetit, të cilët kanë shërbime të cunguara. Nga 40 shërbime të ofruara nga Bashkia e Tiranës, ka mangësi në shërbime bazike si transporti, ushqimi, kancelaritë, librat dhe komunikacioni. Përfaqësia në bordet e administrimit është një tjetër premtim shterpë. “35 anëtarët e rinj të bordit, përfaqësues të MASR, u premtuan të ishin figura publike. Por vetëm 13 janë të tillë, 18 janë funksionarë të administratës publike, 8 nga bota akademike, 6 nga shoqëria civile dhe 3 nga fusha e gazetarisë”. Gjithsesi, edhe kjo pikë është përmbushur jashtë afateve, pa transparencë dhe pjesëmarrje të ulët. Biblioteka dixhitale, një premtim i realizuar dhe që ka kushtuar gati 688 mijë dollarë, rezulton ineficiente për masën e gjerë të studentëve tanë. Me mijëra tituj e materialesh shkencore në gjuhë të huaj, e cila nuk përputhet kurrsesi me kurrikulat tona mësimore. Po ashtu, transparenca e universiteteve ngelet në nivel minimal. Portali i krijuar me të njëjtin emër u- transparenca, përmban të dhëna zyrtare mbi cv e pedagogëve dhe anëtarëve të bordeve, por shfaq problematika në zbardhjen e vendimeve të bordeve, prokurimet publike dhe treguesit financiarë. Të dhënat e raportit janë marrë nga shfletimet e fletores zyrtare, aktet e qeverisë, takimet periodike me studentët dhe kontaktet me institucionet e përfshira për implementimin e paktit për universitetin.