Informaliteti, Ibrahimaj: Do kontrollohen 6200 biznese 6200 BIZNESE
Drejtoresha e Tatimeve: Sektorët me risk të lartë, turizmi e ndërtimi
Për një periudhë trejavore, nga 1064 biznese të kontrolluara, 367 janë konstatuar me shkelje. Drejtoresha e Përgjithshme e Tatimeve, Delina Ibrahimaj, në një konferencë për mediat ka dhënë detaje mbi inspektimet e kryera përgjatë muajit korrik të këtij viti në kuadër të aksionit anti-= informalitet. Ibrahimaj ka paralajmëruar bizneset se do të përballen me masa nëse nuk raportojnë xhiron ditore në mënyrë të rregullt. "Asnjë sipërmarrës nuk mundet që të pasurohet duke shkelur ligjet në kurriz të të tjerëve. Nuk do të ketë më bare, lokale apo hotele që operojnë në treg pa NIPT. Nuk mund të ketë biznese që raportojnë xhiro sa një ambulant. Kjo bie ndesh me parimet e barazisë në treg, bie në kurriz të qytetarëve që kërkojnë me të drejtë shërbime publike të merituara, sepse ata paguajnë TVSH në çdo blerje që bëjnë, por kjo humbet në xhepat e biznesit që nuk e deklarojnë atë. Administrata Tatimore dhe veçanërisht Strukturat e Monitorimit në Terren, po zbatojnë këtë plan operacional kundër informalitetit, i cili do të jetë sistematik, i bashkërenduar edhe me institucione të linjës, të koordinuar nga Ministria e Financave në të gjithë territorin e vendit".
AKSIONI Për periudhën e mbetur të vitit, vuri në dukje më tej drejtoresha e Tatimeve, do të jenë më shumë se 6200 biznese që do të kontrollohen. "Deri në fund të vitit do të kontrollohen 6200 subjekte, nga sektorët e evidentuar me risk të lartë si turizmi, ndërtimi, karburantet, të cilët do të kontrollohen, por lufta kundër informalitetit do të përfshijë çdo subjekt, që prish konkurrencën e ndershme në treg. Administrata Tatimore do të vijojë të informojë të gjitha subjektet dhe qytetarin shqiptar me informacionin e nevojshëm orientues për deklarimin tatimor, në përputhje me ligjin dhe procedurat tatimore. Së shpejti do të kemi edhe një aplikacion ' Stop Informalitetit', për të lehtësuar këtë komunikim", theksoi Ibrahimaj.
BILANCI Sipas saj, gjatë periudhës 01- 21 korrik janë kontrolluar 1,064 subjekte. Në 367 prej tyre janë konstatuar shkelje të legjislacionit tatimor, nga ku 62 subjekte janë konstatuar të paregjistruara në organet tatimore, për të cilat është marrë masa e bllokimit deri në momentin e regjistrimit të tyre, 53 tatimpagues janë penalizuar pasi janë konstatuar me punonjës të padeklaruar, 106 tatimpagues të penalizuar për moslëshimin e kuponit tatimor ( rasti i parë), ndërsa 12 tatimpaguesve u janë bllokuar ambientet për 30 ditë kalendarike për moslëshim kuponi tatimor ( hera e dytë). Pjesa tjetër për mungesë të kasave fiksle dhe disponim të mallrave pa dokumentacion tatimor.