Rrahën dy punonjës të Policisë gjatë aksionit, arrestohen 4 të rinjtë
I riu që u bë mollë sherri, Armando Dredhaj, me precedent penal për shfrytëzim prostitucioni. Policia fsheh akuzën ndaj tij
Patrulla e Policisë, pas marrjes së njoftimit për një konflikt, ka shkuar për të shoqëruar Armando Ciuariu, i njohur dhe me emrin Armando Dredhaj. 36- vjeçari, i cili rezulton me precedent penal jashtë vendit për prostitucion, do të shoqërohej në komisariat si i dyshuar për vepër penale
Refuzojnë shoqërimin e 36- vjeçarit, katër të rinjtë dhunojnë punonjësit e Policisë.
Dy efektivë të Komisariatit të Policisë së Vlorës janë dhunuar nga katër të rinj, në momentin që kanë tentuar të shoqërojnë një të dyshuar. Ngjarja ka ndodhur në orët e vona të mbrëmjes së të dielës në një zonë afër Portit të Vlorës. Patrulla e Policisë, pas marrjes së njoftimit për një konflikt, ka shkuar për të shoqëruar Armando Ciuariu, i njohur dhe me emrin Armando Dredhaj. 36vjeçari, i cili rezulton me precedent penal jashtë vendit për prostitucion, do të shoqërohej në komisariat si i dyshuar për vepër penale. Policia nuk jep më shumë informacione, por dyshohet për kanosje gjatë sherrit. Në momentin që efektivët e Policisë kanë shkuar për të bërë shoqërimin e tij, janë ndeshur në rezistencën e Dredhajt dhe tre shokëve të tij. “Gjatë orëve të mbrëmjes së djeshme në një lokal afër Portit të Vlorës, punonjësit e Policisë kanë shkuar për të bërë shoqërimin e shtetasit A. C., 36 vjeç, për veprime të mëtejshme si i dyshuar për një vepër penale. Në momentin që punonjësit e Policisë do kryenin shoqërimin e shtetasit A. C, kanë ndërhyrë për t’i penguar shokët e këtij shtetasi të cilët kanë kundërshtuar me dhunë shoqërimin e shokut të tyre në Polici, duke dëmtuar fizikisht punonjësit e Policisë, të cilët ndodhen në spital jashtë rrezikut për jetën”, bëhet e ditur nga Policia.
Mësohet se gjithçka ka nisur në një lokal, ku katër të rinjtë janë konfliktuar me njëri- tjetrin. Për të parandaluar përshkallëzimin e konfliktit, një patrullë Policie që ndodhej pranë lokalit në lagjen “Pavarësia” ose siç njihet ndryshe zona e “Skelës”, ka ndërhyrë. Në momentin që është kërkuar shoqërimi i 36- vjeçarit për sqarimin e ngjarjes, policët kanë hasur në rezistencë, madje dy efektivët e Policisë janë ndeshur dhe me dhunën fizike të katër të rinjve. Dy policët e patrullës kanë kërkuar përforcime, për arrestimin e të rinjve. Më pas, dy efektivët e patrullës janë dërguar drejt Spitalit Rajonal të qytetit të Vlorës, ku edhe kanë marrë ndihmën e parë mjekësore, pasi kanë marrë dëmtime në trup dhe kokë nga dhuna e ushtruar ndaj tyre. Efektivët e tjerë të Policisë kanë bërë menjëherë shoqërimin e katër personave, ndërsa pasi janë kryer dhe veprimet përkatëse dhe hetimet për ngjarjen, Policia ka arrestuar në flagrancë të katër të rinjtë, banues në qytetin e Vlorës.
Kjo konsiderohet si një ngjarje mjaft e rëndë kur punonjësit e Policisë sulmohen në krye të detyrës, por zyrtarisht ende nuk ka asnjë akuzë të ngritur ndaj të ndaluarve, pasi çështja i ka kaluar për veprime të mëtejshme Prokurorisë së Vlorës. Disa ndryshime të fundit të Kodit Penal parashikojnë dënime të rënda për agresorët ndaj forcave të Policisë. NJOFTIM ANKANDI