Junajtid, regjim stërvitor brutal lojtarët vrapojnë më shumë se me Moun
Lojtarët e Mançester Junajtid janë në formë fizike të shkëlqyer për shkak të përgatitjes intensive fizike në këtë fazë përgatitore të stafit teknik. Ole Gunar Solskjaer e ka futur skuadrën nën një regjim shumë kërkues për të shmangur rënien fizike që ajo pësoi në fund të sezonit të shkuar. Pas një starti fantastik me teknikun norvegjez, Junajtid e mbylli me vetëm 8 pikë nga 27 të mundshme në 9 ndeshjet e fundit sezonin e shkuar, duke humbur shansin për t'u renditur mes katër vendeve të para. Ole dhe stafi i tij dolën në konkluzionin se rënia e papritur e gjendjes fizike u shkaktua nga niveli i dobët i fitnesit të lojtarëve, të cilët nuk i përballonin dot më kërkesat e një futbolli intensiv.
Stërvitje sfilitëse - Statistikat e "djajve të kuq" janë përmirësuar në Përth dhe Singapor, dy ndalesat e deritanishme të turit të tyre dhe janë më të mira në krahasim me të njëjtën periudhë të një viti më parë, kur skuadrën e drejtonte Zhoze Murinjo. Trajnerët e fitnesit kanë krahasuar seancat stërvitore në dy javët e para të përgatitjeve një vit më parë dhe rezultatet kanë treguar se distancat e përshkuara të vrapimit janë rritur me 10%, ndërsa intensiteti është rritur deri në 50%. Junajtid u stërvit 14 herë në 9 ditë në Përth, me seanca dopio stërvitore që në fillim në Australi, për shkak se në Singapor dhe në Shangai do të gjejnë temperatura më të larta.
Shkëlqen Lingard - Xhesi Lingard, i cili kishte punuar me Solskjaerin që kur ky i fundit ishte trajner i rezervave, ka arritur statistikat më të mira nga shokët e skuadrës në këtë fazë përgatitore. Riçard Houkins, shefi i departamentit të fitnesit te Junajtid tha: "Etika e punës ka qenë fenomenale. Që në ditën e parë të takimit me lojtarët, u prezantuam tri pikat kyçe çfarë ne donim nga ata: të stërviteshin me intensitet; të ishin të përkushtuar; dhe kur të riaftësoheshin ta bënin me rigorozitet. Dëmtimet kryesore që kemi pasur vitet e fundit kanë qenë tërheqje muskulore në ijë. Për këtë kemi punuar në seancat e para stërvitore, jemi përqendruar në stërvitjen e këtyre zonave". Ndërsa Ed Leng, kreu i departamentit të shkencës në "Old Trafford" tha për "Mirror": "Po përpiqemi që t'i dërgojmë në nivelin tjetër të performancës. Po mbledhim të dhëna. Djemtë kanë qenë të shkëlqyer. Nga dita e parë, në stërvitje kemi bërë një javë të plotë pune, me seanca dopio stërvitore. Kemi qenë pak a shumë çdo ditë në palestër dhe lojtarët kthehen vetë për të marrë ngarkesë ekstra". "Djajtë", të cilët do të përballen me Totenhemin në Shangai të enjten, i kanë fituar deri tani të tria ndeshjet e turit të tyre, ndaj Përthit, Lidsit dhe Interit, duke shfaqur intensitet dhe dinamizëm në lojën e tyre, cilësi që kundërshtari e ka pasur të pamundur t'i arrijë në lojën e tij dhe mbi të gjitha nuk ka pësuar ende asnjë gol.